ගාල්ල ප්රදේශයේ පිහිටි පෞද්ගලික රෝහලකට ප්රතිකාර ලබාගැනීම සඳහා පැමිණි ස්වීඩන් ජාතික කාන්තාවකගේ අනුදැනුමකින් තොරව ඇයගේ ශරීරයේ රහස්ය ස්ථාන ස්කෑන් පරීක්ෂාවකට ලක් කළ බව කියන සිද්ධියක් සම්බන්ධයෙන් විකිරණවේදියෙකුට එරෙහිව ගාල්ල පොලිසිය වෙත පැමිණිල්ලක් ලැබී තිබේ.
මෙම සිදුවීමට මුහුණ දී ඇති 32 හැවිරිදි විදේශික කාන්තාව ඉලඇට ආශ්රිතව හටගත් වේදනාවක් හේතුවෙන් අදාළ පෞද්ගලික රෝහල වෙත ගොස් ඇති අතර, එහිදී ඇයව පරීක්ෂා කළ වෛද්යවරයා විසින් රුධිර පරීක්ෂාවක් සහ අල්ට්රා සවුන්ඩ් ස්කෑන් පරීක්ෂණයක් ඇතුළු වෛද්ය පරීක්ෂණ කිහිපයක් සිදු කිරීමට නිර්දේශ කර ඇත.
වෛද්ය නිර්දේශය මත අදාළ කාන්තාව ස්කෑන් පරීක්ෂණය සඳහා යොමු වූ අවස්ථාවේදී එම පරීක්ෂණය සිදු කළ රජයේ සේවයෙන් විශ්රාම ගිය විකිරණවේදී වෛද්යවරයා විසින් ඇයගේ අවසරයකින් තොරව ඇයගේ රහස් ප්රදේශ ස්පර්ශ කරමින් එම ස්ථාන ස්කෑන් පරීක්ෂාවකට ලක් කර ඇති බවත්, ඊට අදාළ කිසිදු වාර්තාවක් තමා වෙත ලබා නොදුන් බවත් ඇය විසින් ඉදිරිපත් කළ පැමිණිල්ලේ සදහන් වේ.
අදාළ කාන්තාව විසින් සිදු කළ පැමිණිල්ලට අනුව ගාල්ල වරාය පොලිසියේ ස්ථානාධිපති රංජන් කොඩිතුවක්කු සහ පොලිස් පරීක්ෂක ප්රෂාන් සිල්වා යන මහත්වරුන්ගේ මූලිකත්වයෙන් මේ වන විට වැඩිදුර විමර්ශන ආරම්භ කර තිබේ.
