රුසියානු ජනාධිපති ව්ලැඩිමීර් පුටින්ගේ නිල නිවසක් ඉලක්ක කර ගනිමින් ඩ්රෝන ප්රහාරයක් එල්ල කළ බවට රුසියාව විසින් එල්ල කරන ලද බරපතල චෝදනා යුක්රේන ජනාධිපති වොලොඩිමීර් සෙලෙන්ස්කි විසින් තරයේ ප්රතික්ෂේප කරනු ලැබ ඇත. සාම සාකච්ඡා ක්රියාවලිය අඩාල කිරීමේ සහ නොමඟ යැවීමේ අරමුණින් මොස්කව් පාලනය විසින් මෙම අසත්ය චෝදනා එල්ල කරන බවට යුක්රේන ජනාධිපතිවරයා රුසියාවට චෝදනා කරයි.
රුසියාවේ වයඹදිග නොව්ගොරොඩ් ප්රදේශයේ පිහිටි පුටින්ගේ රාජ්ය නිවසට දිගු දුර ඩ්රෝන යානා 91ක් යොදා ගනිමින් රාත්රී කාලයේදී ප්රහාරයක් එල්ල කළ බවට රුසියානු විදේශ අමාත්ය සර්ජි ලැව්රොව් ප්රකාශ කර තිබුණි.මෙම සිදුවීමත් සමඟ සාම සාකච්ඡා සම්බන්ධයෙන් තම ස්ථාවරය නැවත සලකා බලන බව රුසියාව ප්රකාශ කර ඇති අතර, අදාළ ප්රහාරය එල්ල වන අවස්ථාවේදී ජනාධිපති පුටින් එම නිවසේ සිටියේද යන්න මෙතෙක් තහවුරු වී නොමැත. රුසියානු විදේශ අමාත්යවරයා ටෙලිග්රාම් පණිවිඩයක් නිකුත් කරමින් කියා සිටියේ, එල්ල කරන ලද ඩ්රෝන යානා සියල්ල රුසියානු ගුවන් ආරක්ෂක පද්ධති මගින් සාර්ථකව විනාශ කළ බවත්, සිද්ධියෙන් කිසිදු පුද්ගල හානියක් හෝ දේපළ හානියක් වාර්තා වී නොමැති බවත්ය. කෙසේ වෙතත්, ඇමෙරිකාව සමඟ පවත්වන සාකච්ඡා ක්රියාවලියෙන් ඉවත් වීමට රුසියාව අදහස් නොකරන බවද ඔහු වැඩිදුරටත් සඳහන් කර ඇත.
මෙම රුසියානු ප්රකාශය "සුපුරුදු රුසියානු බොරුවක්" ලෙස හුවා දැක්වූ ජනාධිපති සෙලෙන්ස්කි, මෙය යුක්රේනයට එරෙහිව තවදුරටත් ප්රහාර එල්ල කිරීමට ක්රෙම්ලිනය විසින් නිර්මාණය කරගත් නිදහසට කරුණක් පමණක් බව පෙන්වා දෙයි. කියෙව්හි රජයේ ගොඩනැගිලි ඉලක්ක කර ගනිමින් රුසියාව මීට පෙරද පහර දී ඇති බව සිහිපත් කළ ඔහු, ලෝකය මේ මොහොතේ නිහඬව නොසිටිය යුතු බවත්, කල් පවත්නා සාමයක් සඳහා වන ප්රයත්නයන් අඩපණ කිරීමට රුසියාවට ඉඩ නොදිය යුතු බවත් සිය 'X' ගිණුමේ සටහනක් තබමින් අවධාරණය කර තිබේ.
මෙම අර්බුදකාරී තත්ත්වය උද්ගත වී ඇත්තේ ඇමෙරිකානු ජනාධිපති ඩොනල්ඩ් ට්රම්ප් සහ යුක්රේන ජනාධිපතිවරයා අතර ෆ්ලොරිඩාහිදී පැවති තීරණාත්මක සාකච්ඡාවලින් පසුව වීම විශේෂත්වයකි. යුද්ධය අවසන් කිරීමේ නව සාම සැලැස්මක් පිළිබඳව එහිදී සාකච්ඡා කර ඇති අතර, 2026 වසරේදී යුද්ධය අවසන් කිරීමට හැකියාවක් පවතින බව සෙලෙන්ස්කි පසුව ෆොක්ස් නිවුස් වෙත පවසා තිබුණි. එහෙත් ඇමෙරිකානු සහාය නොමැතිව යුක්රේනයට යුද්ධය ජයගත නොහැකි බවත්, පුටින් කෙරෙහි තමාට කිසිදු විශ්වාසයක් නොමැති බවත් ඔහු එහිදී වැඩිදුරටත් ප්රකාශ කර ඇත.
සාකච්ඡා අතරතුර ඇමෙරිකාව විසින් යුක්රේනයට වසර 15ක ආරක්ෂක සහතිකයක් ලබා දීමට යෝජනා කර ඇති අතර, එම එකඟතාවයෙන් 95%ක් පමණ මේ වන විට සම්පූර්ණ වී ඇති බව ජනාධිපති ට්රම්ප් සඳහන් කරයි. කෙසේ වෙතත්, රුසියාව විසින් අත්පත් කරගෙන සිටින සැපෝරිෂියා න්යෂ්ටික බලාගාරය සහ ඩොන්බාස් ප්රදේශයේ අනාගතය වැනි භූමිය සම්බන්ධ ගැටලු තවමත් නොවිසඳී පවතී. දැනට ඩොනෙට්ස්ක් ප්රදේශයෙන් 75%ක් සහ ලුහාන්ස්ක් ප්රදේශයෙන් 99%ක් පමණ රුසියාවේ පාලනය යටතේ පවතින අතර මෙම සාම සැලැස්මේ ප්රධාන කොටස් රුසියාව මීට පෙර ප්රතික්ෂේප කර තිබුණි.
මේ අතර ධවල මන්දිරය ප්රකාශ කළේ අදාළ සිදුවීමෙන් පසු ජනාධිපති ට්රම්ප් සහ පුටින් අතර දුරකථන සංවාදයක් පැවති බවයි. ඇමෙරිකාව සාර්ථක යැයි සැලකූ සාකච්ඡා වටයකින් පසුවම මෙම ප්රහාරය එල්ල වූ බව පුටින් එහිදී පෙන්වා දී ඇති බව ක්රෙම්ලිනය පවසයි. මෙම පුවතින් තමන් කෝපයට පත් වූ බව ට්රම්ප් මුලදී ප්රකාශ කළද, පසුව මාධ්යවේදීන් නැගූ ප්රශ්නයකට පිළිතුරු දෙමින් ඔහු කියා සිටියේ ප්රහාරය සැබැවින්ම සිදු වූ බවට ස්වාධීන සාක්ෂි මෙතෙක් දැක නොමැති බවයි. "සමහර විට ප්රහාරය සිදු නොවූවා විය හැකියි, නමුත් පුටින් මට කීවේ එය සිදු වූ බවයි" යනුවෙන් ට්රම්ප් එහිදී අදහස් දක්වා ඇත.