සජිත් ප්රේමදාස වැඩිපුර විදෙස් ගතවීමට කැමැති පුද්ගලයෙකු නොවේ. නමුත් අද වාර්තාවන්නේ ඔහු ඉන්දියාව බලා පිටත්ව ගිය බවයි. ඔහුගේ පූර්වගාමී පක්ෂ නායකයා වන රනිල් වික්රමසිංහ තරම් විදෙස්ගතවීමේ උන්මාදයකින් ඔහු නොපෙලීම කැපී පෙනෙන කරුණකි.
විපක්ෂ නායක සජිත් ප්රේමදාස මහතා තෙදින නිල සංචාරයක් සඳහා අද ඉන්දියාව බලා පිටත්ව ගියේය.
මෙම සංචාරය අතරතුරදී, ඒ මහතා ඉන්දීය රජයේ අමාත්යවරුන් කිහිප දෙනෙකු සහ ජ්යෙෂ්ඨ නිලධාරීන් හමුවී ද්විපාර්ශ්වික වශයෙන් වැදගත් වන කරුණු සාකච්ඡා කිරීමට නියමිතය. එමෙන්ම, ඔහු නිල උත්සව මාලාවකට ද සහභාගී වනු ඇතැයි අපේක්ෂා කෙරේ. කෙසේ වෙතත්, මෙම සංචාරයේදී ඉන්දීය අග්රාමාත්ය නරේන්ද්ර මෝදි මහතා හමුවීමට ඉඩක් නොමැති බව වාර්තා වේ.
2025 වසර තුළ විපක්ෂ නායකවරයා සිදුකළ විදෙස් සංචාර කිහිපයකින් එකක් ලෙස මෙය සැලකේ. මීට පෙර, 2025 අගෝස්තු මාසයේදී ඒ මහතා සිංගප්පූරුවේ සිවිල් සේවා විද්යාලයේ සංචාරයක නිරත වූයේ ශ්රී ලංකාවට අනුවර්තනය කළ හැකි රාජ්ය සේවක පුහුණුව සහ යහපාලන පිළිවෙත් පිළිබඳ අධ්යයනය කිරීමේ අරමුණෙනි.
මීට අමතරව, සජිත් ප්රේමදාස මහතා ශ්රී ලංකාවේ වත්මන් තත්ත්වය පිළිබඳව සාකච්ඡා කිරීම සඳහා කොළඹ සිටින විදේශීය රාජ්ය තාන්ත්රිකයින් සමග ද මෑතකදී හමුවීම් සහ සාකච්ඡා පවත්වා තිබුණි. මෙවැනි මැදිහත්වීම් හරහා ආර්ථික රාජ්ය තාන්ත්රිකභාවය ශක්තිමත් කිරීම කෙරෙහි ඔහු විශේෂ අවධානයක් යොමු කර ඇත.
Comments
Post a Comment
Your comment will be visible after approval