තමන් අත්විඳි විශාදය දීපිකා පදුකෝන් විස්තර කරයි

ඉන්දියානුවන් බොහෝ විට තම රට ගැන සිතන්නේ ලෝකයේ පවතින ශක්තිමත්ම ප්‍රජාතන්ත්‍රවාදී රටක් ලෙස වුවද, සත්‍ය වශයෙන්ම එය ලෝකයේ වැඩිම විෂාදයෙන් (Depression) පෙළෙන ජනගහනයක් සිටින රට බව බොහෝ දෙනා නොදනිති. නවතම සංඛ්‍යාලේඛනවලට අනුව ඉන්දියානුවන්ගෙන් 36%ක් තම ජීවිතයේ කවර හෝ අවස්ථාවක විෂාදයට ගොදුරු වීමේ දැඩි අවදානමක් පවතී.

දිනකට පුද්ගලයින් 371 දෙනෙකු පමණ සියදිවි නසා ගන්නා අතර, එය වසරකට 1,34,000කට අධික අගයකි. මෙවැනි බරපතල තත්ත්වයක් පවතිද්දීත්, සමාජය තවමත් මානසික සෞඛ්‍ය ගැටලු දෙස බලන්නේ ධනවතුන්ගේ හෝ ප්‍රසිද්ධ පුද්ගලයින්ගේ අහංකාර ගැටලුවක් ලෙස මිස විද්‍යාත්මක ප්‍රතිකාර අවශ්‍ය වන රෝගී තත්ත්වයක් ලෙස නොවීම කණගාටුවට කරුණකි.

බොලිවුඩ් සිනමාවේ ඉහළම ජනප්‍රියත්වයක් හිමි දීපිකා පදුකෝන් මෙම සමාජ මතය අභියෝගයට ලක් කළේ තමා මුහුණ දුන් දැඩි මානසික අවපීඩනය පිළිබඳව ප්‍රසිද්ධියේ හෙළිදරව් කරමිනි. ඇය පවසන පරිදි මෙම තත්ත්වය ඇරඹී ඇත්තේ හුදෙක් හිස් බවක් දැනීම, උදරයේ ඇතිවන අපහැදිලි වේදනාව සහ කිසිදු හේතුවක් නොමැතිව හදිසියේ හඬා වැටීම වැනි රෝග ලක්ෂණ සමඟිනි. එවකට චිත්‍රපටයක රූගත කිරීම් සිදු කරමින් සිටි ඇය, දැඩි මානසික පීඩනයක් සහිතව වුවද දිනපතා බලහත්කාරයෙන් මෙන් සේවයට වාර්තා කර ඇති අතර, තමාට කුමක් සිදුවන්නේද යන්න පිළිබඳව ඇයට කිසිදු අවබෝධයක් තිබී නොමැත.

දීපිකාගේ මෙම වෙනස මුලින්ම හඳුනාගෙන ඇත්තේ ඇයව බැලීමට පැමිණි ඇයගේ මව විසිනි. මවගේ මැදිහත්වීම මත පවුලේ මිතුරියක සහ උපදේශකවරියක වන ඇනා චන්ඩි සම්බන්ධ කර ගැනීම ඇයගේ සුවය ලැබීමේ ගමනේ තීරණාත්මකම අවස්ථාව විය. ආරම්භයේදී ඖෂධ ප්‍රතිකාර ලබා ගැනීමට අකමැති වුවද, පසුව ඇති වූ දැඩි මානසික වෙහෙස (Exhaustion) හේතුවෙන් ඇය වෛද්‍ය උපදෙස් පිළිගැනීමට තීරණය කළාය. මානසික අවපීඩනය යනු හුදෙක් සිතුවිලි පාලනය කිරීමෙන් පමණක් ජය ගත හැකි තත්ත්වයක් නොව, එය ශරීරයේ රසායනික වෙනස්කම් හා බැඳුනු ප්‍රතිකාර අවශ්‍ය රෝගී තත්ත්වයක් බව ඇය අවබෝධ කර ගත්තාය.

තමාගේ රෝගී තත්ත්වය පිළිබඳව ප්‍රසිද්ධියේ කතා කිරීමට තීරණය කිරීමේදී විවිධ අභියෝගවලට මුහුණ දීමට ඇයට සිදු විය. මෙය චිත්‍රපට ප්‍රවර්ධන උපක්‍රමයක් ලෙස ඇතැමුන් හෑල්ලුවට ලක් කළද, ඇයගේ අරමුණ වූයේ ඉන්දියාව ඇතුළු ලෝකය මානසික රෝග දෙස බලන ආකාරය වෙනස් කිරීමයි. තමාගේ කතාව පැවසීමෙන් එක් අයෙකුගේ හෝ ජීවිතයක් බේරා ගැනීමට හැකි නම් එය තමා ලැබූ ජයග්‍රහණයක් බව ඇය විශ්වාස කළාය. අද වන විට ඇය පිහිටුවා ඇති පදනම හරහා පාසල්, විශ්වවිද්‍යාල සහ ආයතනික මට්ටමින් මානසික සෞඛ්‍ය පිළිබඳ දැනුවත් කිරීමේ වැඩසටහන් රැසක් ක්‍රියාත්මක කරයි.

විශේෂයෙන්ම ආයතනික ක්ෂේත්‍රය තුළ සේවකයින්ගේ මානසික සෞඛ්‍යය පිළිබඳව දැඩි අවධානයක් යොමු කළ යුතු බව දීපිකා අවධාරණය කරයි. කාර්යාල තුළ අභ්‍යන්තර උපදේශකයෙකු සිටීම හෝ සේවකයින්ට තම ගැටලු විවෘතව කතා කිරීමට අවස්ථාව සලසා දීම අත්‍යවශ්‍ය වේ. "ඔබට කෙසේද?" (How are you?) යනුවෙන් යමෙකුගෙන් විමසන විට එය හුදු ආචාරශීලී වචනයක් පමණක් නොවිය යුතු අතර, සැබවින්ම අනෙක් පුද්ගලයාට සවන් දීමට කාලය වෙන් කිරීම වැදගත් බව ඇය පෙන්වා දෙයි. කායික රෝගයකට ප්‍රතිකාර ගන්නා සේම, මානසික ගැටලුවකදී උපදේශනය ලබා ගැනීම සාමාන්‍ය දෙයක් ලෙස (Normalize) සමාජය විසින් පිළිගත යුතු බව ඇයගේ ප්‍රබලම පණිවිඩයයි.

ඇගේ කතාව සිංහල උපසිරසි සහිත වීඩියෝව මෙතැනින් බලන්න click here