research-reveals-that-exercise-can-reduce-cancer-cell-growth-by-30-percent

 ඕස්ට්‍රේලියාවේ එඩිත් කොවන් විශ්වවිද්‍යාලයේ (ECU) නව පර්යේෂණයකින් හෙළි වී ඇත්තේ තනි ව්‍යායාම සැසියක් පවා පිළිකා සටනට ධනාත්මක බලපෑමක් කළ හැකි බවයි. ප්‍රතිරෝධක පුහුණුව (resistance training) හෝ අධි-තීව්‍රතා අන්තරාල පුහුණුව (high intensity interval training - HIIT) වැනි එක් ව්‍යායාම වාරයක් මේ සඳහා දායක වන බව එම විශ්වවිද්‍යාලයේ ආචාර්ය උපාධි අපේක්ෂක ෆ්‍රැන්චෙස්කෝ බෙටරිගා මහතාගේ පර්යේෂණයෙන් පෙන්වා දී තිබේ.



පර්යේෂකයා සොයාගෙන ඇත්තේ එක් ව්‍යායාම සැසියකින් පසුව, මාංශ පේශී මගින් නිපදවන 'මයෝකයින්' (myokines) නමැති ප්‍රෝටීන මට්ටම ශරීරය තුළ ඉහළ යන බවයි. මෙම මයෝකයින් ප්‍රෝටීනවලට පිළිකා නාශක ගුණ ඇති අතර, පිළිකා සෛල වර්ධනය වීම සියයට 20 ත් 30 ත් අතර ප්‍රමාණයකින් අඩු කිරීමට ඊට හැකියාව පවතින බවද අනාවරණය වී ඇත.




පිළිකා කළමනාකරණයේදී, එනම් ප්‍රතිකාර ලබන අතරතුර හෝ ප්‍රතිකාරවලින් පසුව, ව්‍යායාම යනු ආරක්ෂිත සහ ඵලදායී චිකිත්සක මැදිහත්වීමක් බවට මේ වන විටත් සාක්ෂි රාශියක් පවතී. මෙම නවතම අධ්‍යයනය සඳහා පියයුරු පිළිකාවෙන් දිවි ගලවා ගත් කාන්තාවන් යොදාගෙන ඇති අතර, ඔවුන් එක් ප්‍රතිරෝධක හෝ අධි-තීව්‍රතා ව්‍යායාම සැසියකට සහභාගී වීමට පෙර, ඊට වහාම පසුව සහ මිනිත්තු 30 කට පසුව ඔවුන්ගේ මයෝකයින් මට්ටම් මැන බලන ලදී.

නිරෝගී පුද්ගලයෙකු දැඩි ව්‍යායාමයකින් පසු ඉහළ මයෝකයින් මට්ටම් පෙන්වීම අපේක්ෂිත වුවද, පිළිකාව සහ එහි ප්‍රතිකාර ශරීරයට ඇති කරන බලපෑම් හේතුවෙන් පියයුරු පිළිකා සුවය ලබන්නන් තුළද එම ප්‍රතිඵලයම ලැබේවිද යන්න පිළිබඳව පර්යේෂකයන්ට නිශ්චිත අදහසක් නොතිබිණි. කෙසේ වෙතත්, මෙම අධ්‍යයනයේ ප්‍රතිඵල පෙන්වා දුන්නේ ව්‍යායාම වර්ග දෙකෙන්ම පියයුරු පිළිකා සුවය ලබන්නන්ගේ ශරීර තුළ පිළිකා නාශක මයෝකයින් නිපදවීම ඉහළ ගිය බවයි.

මෙම අධ්‍යයනයේ ප්‍රතිඵල, පිළිකා ප්‍රතිකාර සඳහා වන සම්මත සත්කාර ක්‍රමවේදයට ව්‍යායාම එක් කිරීමට ඉතා විශිෂ්ට පෙළඹවීමක් සපයයි. මන්දයත්, ව්‍යායාම වර්ග දෙකම පිළිකා සුවය ලබන්නන් තුළ මෙම හිතකර ප්‍රෝටීන නිපදවීමට සැබවින්ම ක්‍රියා කරන බව එමගින් තහවුරු වන බැවිනි.




මීට අමතරව, අඛණ්ඩව ව්‍යායාම කිරීමෙන් ශරීර සංයුතියේ සිදුවන වෙනස්කම්, 'ප්‍රදාහය' (inflammation) කෙරෙහි බලපාන ආකාරය පිළිබඳවද පර්යේෂකයෝ විමර්ශනය කළහ. පියයුරු පිළිකා නැවත ඇතිවීමට සහ මරණ අනුපාතයට මෙම ප්‍රදාහය ප්‍රධාන කාර්යභාරයක් ඉටු කරන්නේ එය ගෙඩි වර්ධනය වීම ප්‍රවර්ධනය කරන බැවිනි.

ශරීරයේ පවතින නොනවතින ප්‍රදාහ තත්ත්වයන්, පිළිකා සෛල වර්ධනය, පැවැත්ම, ආක්‍රමණශීලීත්වය සහ වෙනත් ස්ථාන කරා පැතිරීම (metastasis) කෙරෙහි බලපෑම් කරමින් ගෙඩි වර්ධනය ප්‍රවර්ධනය කරනවා පමණක් නොව, ශරීරයේ ප්‍රතිශක්තිකරණ ක්‍රියාවලියද වළක්වයි. පිළිකා තත්ත්වය සහ ප්‍රතිකාරවල අතුරු ආබාධ හේතුවෙන් ශරීරයේ ප්‍රදාහකාරී ජෛව සලකුණු මට්ටම් ඉහළ යා හැකි බැවින්, පියයුරු පිළිකාවෙන් සුවය ලබන්නන් පිළිකාව තවදුරටත් වර්ධනය වීමේ, නැවත මතුවීමේ සහ මරණයේ වැඩි අවදානමක පසුවේ.
(Scientific India ඇසුරිනි)