මස්ක්ගේ සයිබර් ට්‍රක් නොවිකිණීම නිසා තමන්ගේ කම්පැනි වල භාවිතයට යවලා

 ටෙස්ලා සමාගමේ සයිබර්ට්‍රක් රථ අලෙවිය, 2024 වසරේ තෙවන කාර්තුවට සාපේක්ෂව 2025 වසරේ තෙවන කාර්තුවේදී 63% ක දැවැන්ත කඩාවැටීමකට ලක්ව ඇති බව වාර්තා වේ. මෙම කාලය තුළ අලෙවි කර ගැනීමට හැකිවී ඇත්තේ සයිබර්ට්‍රක් රථ 5,385 ක් වැනි සුළු ප්‍රමාණයකි.

2025 වසරේ මේ දක්වා කාලය තුළ සමස්ත සයිබර්ට්‍රක් අලෙවිය 16,000 ක් ලෙස සටහන් වන අතර, එය වාර්ෂිකව රථ 250,000 ක් අලෙවි කිරීමට ඉලෝන් මස්ක් තැබූ මුල් පුරෝකථනයට වඩා බෙහෙවින් පහළ අගයකි. පසුව 2025 වසර සඳහා වූ ඉලක්කය 50,000 ක් දක්වා අඩු කළද, වර්තමාන තත්ත්වය අනුව සමාගම අපේක්ෂා කරන්නේ රථ 20,000 ක් පමණක් අලෙවි කිරීමට හැකිවනු ඇති බවයි.

මෙම අලෙවි පසුබෑම මධ්‍යයේ, ඉලෝන් මස්ක්ගේ අනෙකුත් පෞද්ගලික සමාගම් වන 'xAI' සහ 'SpaceX' වෙත විකිණී නොමැති සයිබර්ට්‍රක් රථ විශාල තොග වශයෙන් ලබා දීමට ඔහු පියවර ගෙන ඇති බව පෙනී යයි. පසුගිය සති අන්තයේ 'xAI' කාර්යාල වෙත සයිබර්ට්‍රක් රථ රැගත් ට්‍රක් රථ කිහිපයක්ම ගමන් කරනු දක්නට ලැබී ඇති අතර, සති කිහිපයකට පෙර 'SpaceX' සමාගම වෙතද මෙවැනිම තොගයක් ලබා දී තිබුණි.



සැප්තැම්බර් 30 වන දින විදුලි වාහන මිලදී ගැනීම් සඳහා ලබාදුන් ඩොලර් 7,500 ක බදු සහනය කල් ඉකුත් වීමත් සමඟ, වසරේ සිව්වන කාර්තුව තවත් අභියෝගාත්මක වනු ඇතැයි අපේක්ෂා කෙරේ. විදුලි වාහන වෙළඳපොළ ආවරණය කරන 'Electrek' වෙබ් අඩවියේ ෆ්‍රෙඩ් ලැම්බර්ට් පෙන්වා දෙන්නේ, මෙම බදු සහනය හේතුවෙන් ඉදිරි ඉල්ලුමද කලින්ම ලැබීම නිසා සිව්වන කාර්තුව දුෂ්කර වනු ඇති බව ඉලෝන් මස්ක් දන්නා බවයි.

තවදුරටත් අදහස් දක්වන ලැම්බර්ට්, සැප්තැම්බර් මස අවසානයට පෙර ආපසු නොගෙවන තැන්පතු සමඟ ඇණවුම් ලබා ගත්තේ නම්, සිව්වන කාර්තුවේදීත් බදු සහනය සහිතව රථ ලබා දීමට විධිවිධාන පැවති බව සඳහන් කරයි. ඔහුගේ අනුමානය වන්නේ, ටෙස්ලා සමාගමේ සිව්වන කාර්තුවේ අලෙවි සංඛ්‍යා ඉහළ නැංවීම සඳහා ඉලෝන් මස්ක් විසින් 'SpaceX' සහ 'xAI' සමාගම් ලවා තුන්වන කාර්තුව අවසන් වීමට පෙර සයිබර්ට්‍රක් දහස් ගණනක් ඇණවුම් කරන්නට ඇති බවය.