විද්‍යුත් වාහන උනන්දුව අඩුවෙලා

 වායු දූෂණය අවම කරමින් පුනර්ජනනීය බලශක්තිය ප්‍රවර්ධනය කිරීමේ රාජ්‍ය අරමුණක් ලෙස විද්‍යුත් වාහන භාවිතය දිරිගැන්වීමට තීරණය කර තිබියදී, එම වාහන සඳහා වන මහජන උනන්දුව මේ වන විට අඩු වෙමින් පවතින බව විද්‍යුත් වාහන හිමියන්ගේ සංගමය ඊයේ (14) දින අනාවරණය කළේය.

මෙසේ ජනතා උනන්දුව හීන වීමට ප්‍රධාන හේතුව වී ඇත්තේ බී.වයි.ඩී. (BYD) වර්ගයේ විද්‍යුත් වාහන දහසකට අධික සංඛ්‍යාවක් රේගු භාරයේ රඳවා තබා ගැනීමට ගෙන ඇති තීරණය බව එම සංගමය පෙන්වා දෙයි. මෙම ක්‍රියාමාර්ගය හේතුවෙන් දැනටමත් විද්‍යුත් වාහන සඳහා මුදල් ආයෝජනය කර ඇති පාරිභෝගිකයන් දැඩි ලෙස අධෛර්යයට පත්ව ඇති අතර, සමස්ත වෙළෙඳපොළ තුළම අවිනිශ්චිත තත්ත්වයක් නිර්මාණය වී ඇතැයි ද ඔවුහු කියා සිටියහ.

පසුගිය ජූලි මාසයේදී රේගුව විසින් බී.වයි.ඩී. වාහන තොග දෙකක් රඳවා ගනු ලැබූවද, ශ්‍රේෂ්ඨාධිකරණයට ඉදිරිපත් වූ රිට් පෙත්සමකින් අනතුරුව වාහන 991 ක් සහ 506 ක් බැංකු ඇපකරයක් මත නිදහස් කිරීමට පසුගිය අගෝස්තු 7 වැනිදා පියවර ගෙන තිබිණි.

කෙසේ වෙතත්, තවත් බී.වයි.ඩී. වාහන 1000 ක් තවමත් රේගු භාරයේ පවතින අතර, එම වාහන ආනයනය කළ ජෝන් කීල්ස් සී.ජී. ඔටෝ සමාගම ඒවා කඩිනමින් නිදහස් කර ගැනීමේ අවශ්‍යතාව මෑතකදී අවධාරණය කර තිබුණි. අදාළ සමාගම විසින් ප්‍රකාශයට පත් කරන ලද මෝටර් ධාරිතාව සම්බන්ධයෙන් පැන නැගුණු ගැටලුවක් මුල් කරගනිමින් ශ්‍රී ලංකා රේගුව මෙම වාහන තොගය රඳවා ගැනීමට තීරණය කර ඇත. රේගුවේ මෙම ක්‍රියාකලාපය, දැනටමත් විද්‍යුත් වාහන මිලදී ගෙන ඇති හෝ ඒ සඳහා අත්තිකාරම් මුදල් ගෙවා ඇති පාරිභෝගිකයන්ට සෘජුවම බලපා ඇති බව විද්‍යුත් වාහන හිමියන්ගේ සංගමය පවසයි. පසුගිය මාස හයක කාලය තුළ අවම වශයෙන් පාරිභෝගිකයින් දස දහසක් (10,000) විද්‍යුත් වාහන හෝ ප්ලග්-ඉන් දෙමුහුන් (plug-in hybrid) වාහන මිලදී ගෙන ඇති බවද එම සංගමය වැඩිදුරටත් සඳහන් කළේය.

මෙම තත්ත්වය සැලකිල්ලට ගෙන, විද්‍යුත් වාහන ආනයන ක්‍රියාවලිය විධිමත් කිරීම සඳහා වහාම රජයේ මැදිහත්වීමක් අපේක්ෂා කරන බව විද්‍යුත් වාහන හිමියන්ගේ සංගමයේ කැඳවුම්කරු දීලක පිටගම්පොල මහතා ඉල්ලා සිටියි. නිෂ්පාදකයා තහවුරු කරන මෝටර් ධාරිතාව රේගුව විසින් ප්‍රතික්ෂේප කරන අවස්ථාවක, එය නිවැරදිව තහවුරු කර ගැනීම සඳහා ජාත්‍යන්තරව පිළිගත් පරීක්ෂණාගාර පහසුකමක් මෙරට නොමැති වීම බරපතල ව්‍යාකූල තත්ත්වයක් බව ඒ මහතා පෙන්වා දුන්නේය. මෙමගින් පාරිභෝගික විශ්වාසය බිඳ වැටෙන බවද ඔහු අවධාරණය කළේය. මෝටර් ධාරිතාව වැනි තාක්ෂණික කරුණක් තහවුරු කළ හැක්කේ නවීන තාක්ෂණයෙන් යුත් පරීක්ෂණාගාරයක් තුළදී පමණක් බව සඳහන් කළ ඒ මහතා, එවැනි පහසුකමක් නොමැතිව දේශීය වශයෙන් එය තහවුරු කිරීමට උත්සාහ කිරීමෙන් කිසිදු පාර්ශ්වයකට සෑහීමකට පත්විය හැකි විසඳුමක් නොලැබෙනු ඇති බවත්, ඉන් තත්ත්වය තවත් උග්‍ර වනු ඇති බවත් ප්‍රකාශ කළේය.



ශ්‍රී ලංකාවේ විශ්ව විද්‍යාල ඇතුළු විශේෂඥයින් සතුව අවශ්‍ය න්‍යායාත්මක දැනුම පැවතියද, මෙවැනි නිවැරදි පරීක්ෂණයක් සිදු කිරීමට අවශ්‍ය යටිතල පහසුකම් ඔවුන් සතුව නොමැති බව පිටගම්පොල මහතා පැහැදිලි කළේය. එබැවින්, නිසි තාක්ෂණික තහවුරු කිරීමකින් තොරව රේගුව විසින් පත් කරනු ලබන කමිටුවක් මගින් නිකුත් කෙරෙන ඕනෑම වාර්තාවක්, පවතින අර්බුදය තව තවත් සංකීර්ණ කිරීමට හේතු විය හැකි බවත්, ඉන් අවසාන හානිය සිදුවන්නේ විද්‍යුත් වාහන මිලදී ගත් පාරිභෝගිකයින්ට බවත් ඒ මහතා අනතුරු අඟවා සිටියේය.