වටවල තේ දැන්වීමක් සමාජ කතිකාවතක් ඇවිළවූ හැටි

'කොටුවෙන්න එපා වටවෙන්න' යන තේමාව යටතේ වටවල තේ සන්නාමය විසින් එළිදක්වන ලද වෙළඳ දැන්වීම් මාලාවක එක් නිර්මාණයක් මේ වන විට සමාජ මාධ්‍ය තුළ උණුසුම් සංවාදයක් නිර්මාණය කර තිබේ. දරුවන් සහ දෙමාපියන් අතර ඇති සම්බන්ධතාවය පදනම් කරගත් මෙම ප්‍රචාරණ ව්‍යාපාරයේ, 'Him, Her and Them' ලෙස නම් කරන ලද වෙළඳ දැන්වීම හේතුවෙන් සමාජය දෙපාර්ශ්වයකට බෙදී දැඩි මතවාදී ගැටුමක නිරතව සිටිනු දක්නට ලැබේ.

ඇතිවූ විවේචන වලින් පසුව වටවල සමාගම සිය සමාජ මාධ්‍ය ඇතුළු සියලු වේදිකා වලින් මෙම දැන්වීම ඉවත් කරගෙන ඇත.
මෙම දැන්වීම මගින් දරුවාගේ සැබෑ ස්වරූපය සහ විවිධත්වය පිළිගැනීමේ වැදගත්කම අවධාරණය කිරීමට උත්සාහ දරා ඇති බව එක් පාර්ශ්වයක් පෙන්වා දෙයි.

මෙම වෙළඳ දැන්වීමට එරෙහිව නැගෙන ප්‍රධානතම චෝදනාව වන්නේ, එය බාහිර රාජ්‍ය නොවන සංවිධානවල මූල්‍ය අනුග්‍රහය මත මෙරට සමාජයට LGBTQ සංකල්ප ප්‍රවර්ධනය කිරීම සඳහා නිර්මාණය කරන ලද්දක් බවයි. කුඩා දරුවන් යොදා ගනිමින් ලිංගික දිශානතිය පිළිබඳ කාරණා සාකච්ඡාවට ගැනීම බරපතළ ළමා අපචාරයක් බවත්, එය රටේ නීතියට පටහැනි ක්‍රියාවක් බවත් විරෝධය දක්වන්නෝ පෙන්වා දෙති. මෙම ප්‍රචාරණ ව්‍යාපාරය පිටුපස විදේශීය අරමුදල් ඇති බවත්, USAID වැනි ආයතන මගින් මෙවැනි මතවාද සමාජගත කිරීමට විශාල මුදලක් යොදවන බවටත් ඔවුහු චෝදනා කරති.

එමෙන්ම, ඇතැම් සමාජ මාධ්‍ය විචාරකයින් පෙන්වා දෙන්නේ මෙය අසාර්ථක අලෙවිකරණ උපක්‍රමයක් බවයි.

Bud Light සහ Jaguar වැනි ලෝක ප්‍රකට සන්නාමයන් මෙවැනි මතභේදාත්මක සමාජ කාරණා සමග අත්වැල් බැඳ ගැනීමට ගොස් තම පාරිභෝගික පදනම අහිමි කරගත් බවත්, තේ වැනි නිෂ්පාදනයක් පරිභෝජනය කරන බහුතර පාරිභෝගිකයින්ගේ මතයට පටහැනිව යෑමෙන් 'වටවල' සන්නාමයටද එම ඉරණම අත්විය හැකි බවත් ඔවුහු අනතුරු අඟවති. ඔවුන්ගේ තර්කය වන්නේ, සමාජ සාධාරණත්වය වෙනුවෙන් පෙනී සිටීමට වඩා තම පාරිභෝගික කණ්ඩායම නිවැරදිව හඳුනා ගැනීම ව්‍යාපාරික සාර්ථකත්වයට වැදගත් බවයි.

කෙසේ වෙතත්, මෙම වෙළඳ දැන්වීම අගය කරන පිරිස පෙන්වා දෙන්නේ, එය ඉතා වැදගත් සමාජ සංවාදයකට මග පාදා ඇති බවයි. සාම්ප්‍රදායිකව පිරිමි ළමයින් සුපිරි වීරයින්ටත්, ගැහැණු ළමයින් බෝනික්කන්ටත් කැමති විය යුතුය යන සමාජ සම්මතයන් තුළ දරුවන් කොටු නොකර, ඔවුන්ගේ සැබෑ රුචිකත්වයන්ට ඉඩ දීමේ වටිනාකම මෙයින් සාකච්ඡා කරන බව ඔවුහු පවසති. පාසල් වියේදී පවා වෙනස් හැසිරීම් රටා පෙන්වූ දරුවන් සමච්චලයට ලක්වූ අයුරු සිහිපත් කරන ඔවුන්, පුද්ගල විවිධත්වය ඉවසීමට හා පිළිගැනීමට සමාජය තවමත් සූදානම් නැති බව පෙන්වා දෙයි.

මෙම දැන්වීම හරහා වටවල තේ උත්සාහ කරන්නේ හුදෙක් තේ නිෂ්පාදනයක් විකිණීමට වඩා, දියුණු චින්තනයක් සහ සමාජ වටිනාකමක් තම සන්නාමය හා සම්බන්ධ කිරීමට බවද ඇතැමුන්ගේ මතයයි. මෙම දැන්වීම වටා ගොඩනැගෙන සංවාදය මගින් ශ්‍රී ලාංකීය සමාජයක් ලෙස මෙවැනි මාතෘකා සාකච්ඡා කිරීමට අප කොතරම් සූදානම්ද යන්න මැන බැලීමට අවස්ථාවක් ලැබී ඇති බව ඔවුන්ගේ අදහසයි. අවසානයේදී, මෙම වෙළඳ දැන්වීම නිර්මාණය කර ඇති කතිකාවත, එහි වාණිජමය සාර්ථකත්වය හෝ අසාර්ථකත්වය මෙන්ම වැදගත් සමාජමය මැදිහත්වීමක් ලෙස සැලකිය හැකිය.

ඔබගේ පරීක්ෂාව සඳහා මතභේදයට ලක්වූ වෙළෙඳ දැන්වීම් වීඩියෝව සහ වටවල සමාගම පළ කළ නිවේදනය පහතින්