මීට වසර තුනකට පෙර පැරිසියේදී 12 හැවිරිදි දැරියක දූෂණය කර, වධ හිංසා පමුණුවා ඝාතනය කළ කාන්තාවකට සිකුරාදා දිනයේදී ප්රංශ අධිකරණයක් විසින් පැරෝල් රහිත ජීවිතාන්තය දක්වා සිර දඬුවමක් නියම කළ බව විදෙස් මාධ්ය වාර්තා කරයි.
ඇල්ජීරියානු ජාතික 27 හැවිරිදි දහ්බියා බෙන්කිරෙඩ් (Dahbia Benkired) නමැති මෙම කාන්තාව, ලෝලා ඩේවියට් (Lola Daviet) දැරියට එරෙහිව සිදුකළ අපරාධ වෙනුවෙන් අවම වශයෙන් වසර 30ක් වත් සිරගතව සිටිය යුතු බවට නියම වී ඇත. ප්රංශයේ බීඑෆ්එම්ටීවී වැඩිදුරටත් සඳහන් කරන්නේ, ප්රංශ දණ්ඩ නීති සංග්රහය යටතේ ඇති මෙම දරුණුතම දඬුවම ලැබූ ප්රංශයේ පළමු කාන්තාව ඇය බවයි.
2022 වසරේ ඔක්තෝබර් මාසයේදී, ඩේවියට් දැරියගේ සිරුර අංග විකෘත කර, ඇය ජීවත් වූ ගොඩනැගිල්ලෙන් පිටත පොදු ස්ථානයක තිබූ ප්ලාස්ටික් පෙට්ටියක බහා තිබියදී සොයා ගත් බව පැරිස් පොලිස් නඩු පවරන්නාගේ කාර්යාලය එකල ප්රකාශයක් නිකුත් කරමින් සඳහන් කළේය.
මෙම වින්දිත දැරියගේ සිරුර සොයාගනු ලැබුවේ, ඇය අතුරුදන් වූ බවට ප්රථම වරට වාර්තා වී පැය කිහිපයක් ගතවූ පසුව බවද එම ප්රකාශයේ දැක්විණි.
ඝාතනය සිදු වූ දින පස්වරු 3:15 ට පාසල් දැරිය, බෙන්කිරෙඩ් සමඟ ඇයගේ මහල් නිවාස ගොඩනැගිල්ලට ඇතුළු වන අයුරු සීසීටීවී දර්ශනවල සටහන්ව තිබී ඇත. පැය දෙකකටත් අඩු කාලයකට පසුව, ඝාතක කාන්තාව බර ගමන් මල්ලක් රැගෙන ගොඩනැගිල්ලෙන් තනිවම පිටව යන අයුරු දර්ශනවල දැක්වෙන බව පොලිස් ප්රකාශයේ සඳහන් විය.
පොලිස් නඩු පවරන්නාගේ ප්රකාශයට අනුව, ඩේවියට් දැරිය මියගොස් ඇත්තේ හුස්ම හිරවීම සහ ගෙල සිරකිරීමේ සලකුණු සහිතව, හෘද-ශ්වසන ක්රියාකාරිත්වය අඩපණ වීමෙනි.
ඇයට වෙනත් බහුවිධ තුවාල සිදුව තිබූ අතර, "විශේෂයෙන් ඇගේ මුහුණේ, පිටේ සහ ගෙලෙහි විශාල කැපුම් තුවාල පැවතුණද, මරණ පරීක්ෂකවරයාගේ නිගමනවලට අනුව ඒවා ඇගේ මරණයට හේතු වී නොමැත" යැයි පොලිස් ප්රකාශයේ තවදුරටත් සඳහන් විය.
වින්දිත දැරිය ජීවත් වූ එම ගොඩනැගිල්ලේම පිහිටි තම සහෝදරියගේ මහල් නිවාසයට ඩේවියට් දැරියව රැගෙන ගිය බව බෙන්කිරෙඩ් පොලිසියට පවසා තිබුණි.
එම ප්රකාශයට අනුව, එහිදී ඇය දැරියට ස්නානය කිරීමට බල කර, පසුව "ඇයගේ මරණයට හේතු වූ ලිංගික අතවර සහ වෙනත් ප්රචණ්ඩ ක්රියා" සිදු කළ බවත්, ඉන් අනතුරුව දැරියගේ සිරුර ප්ලාස්ටික් පෙට්ටියක සඟවා තැබූ බවත් ඇය පිළිගෙන ඇත.
සිකුරාදා දින අධිකරණයේදී බෙන්කිරෙඩ්, තමන් සිදුකළ අපරාධ "භයානක" බව පවසා, නඩු තීන්දුව ප්රකාශයට පත් කිරීමට පෙර සමාව ඉල්ලා සිටි බව බීඑෆ්එම්ටීවී සේවය වාර්තා කළේය.
ඝාතකයාට දඬුවම් නියම කිරීමෙන් පසු ප්රකාශයක් නිකුත් කරමින්, ලෝලා ඩේවියට්ගේ සොහොයුරා, බෙන්කිරෙඩ්ට දඬුවම් දීම සම්බන්ධයෙන් ප්රංශ අධිකරණ පද්ධතියට ස්තූතිය පළ කළ අතර, තම පවුල "ලැබුණු ප්රතිචාරය පිළිබඳව සතුටු වන" බවද පැවසීය. වින්දිත දැරියගේ මවද එය අනුමත කරමින්, "එය අපේ ලෝලාව නැවත ගෙන එන්නේ නැතත්" තීන්දුව ගැන සතුටු වන බව එම මාධ්ය ආයතනයට පවසා තිබුණි.
ඩේවියට් පවුලේ නීතිඥ ක්ලොටිල්ඩ් ලෙපෙටිට් (Clotilde Lepetit) මහත්මිය, "හේතුව, මනුෂ්යත්වය, සත්යය සහ මතකය මත පදනම් වූ සාධාරණ තීරණයක්" ලෙස මෙම තීන්දුව පිළිගත් බව බීඑෆ්එම්ටීවී වාර්තා කළේය.
බෙන්කිරෙඩ්ගේ නීතිඥ ඇලෙක්සැන්ඩ්රේ වැලොයිස් (Alexandre Valois) පැවසුවේ සිකුරාදා දින නඩු තීන්දුව පුදුමයට කරුණක් නොවන බවයි. තම සේවාදායිකාව ඇගේ දඬුවමට එරෙහිව අභියාචනයක් ඉදිරිපත් කරන්නේද යන්න තවමත් තීරණය කර නොමැති බව ඔහු මාධ්යවේදීන්ට පැවසූ බව බීඑෆ්එම්ටීවී සේවය වාර්තා කළේය.
Comments
Post a Comment
Your comment will be visible after approval