නිව් සවුත් වේල්ස් සහ බටහිර ඕස්ට්රේලියාව අතර පැවති ෂෙෆීල්ඩ් පළිහ ක්රිකට් තරගය අතරතුර විනිසුරු තීරණයකට එරෙහිව අප්රසාදය පළ කිරීම හේතුවෙන් නිව් සවුත් වේල්ස් කණ්ඩායමේ තුන් ඉරියව් ක්රීඩක ක්රිස් ග්රීන් හට ක්රිකට් ඕස්ට්රේලියාවේ ආචාරධර්ම සංග්රහය උල්ලංඝනය කිරීමේ චෝදනාවක් නිකුත් කර තිබේ.
මෙම සිදුවීම විශේෂත්වයක් වූයේ, දැවී ගිය ක්රීඩකයෙකු ලෙස නම් කිරීමෙන් අනතුරුව, එම තීරණය වෙනස් කර ඔහුව නැවතත් පන්දුවට පහර දීම සඳහා කැඳවීමත් සමඟ මෙම තත්ත්වය උද්ගත වීමයි.WACA ක්රීඩාංගණයේදී පැවති තරගයේදී, මැතිව් කෙලීගේ බවුන්සර් පන්දුවක් ක්රිස් ග්රීන්ගේ පිත්තේ වැදී කඩුලු රකින ජොයෙල් කර්ටිස් අතට ගිය බවට විනිසුරු ජෙරාඩ් අබූඩ් විසින් තීරණය කර ඔහුව දැවී ගිය ක්රීඩකයෙකු ලෙස නම් කරන ලදී. එම අවස්ථාවේදී කෙලීගේ පන්දුවෙන් බේරීමට උත්සාහ කිරීමේදී බිම ඇද වැටුණු 32 හැවිරිදි ග්රීන්, බිම වාඩි වී සිටිමින්ම තත්පර 15ක් පමණ විනිසුරුවරයා සමඟ වාදයක පැටලී සිටියේය.
ක්රීඩාගාරය වෙත ගමන් කරමින් සිටින අතරතුර පවා ඔහු සිය අප්රසාදය දිගින් දිගටම පළ කළ අතර, පසුව ඔහුට පිටියේ රැඳී සිටින ලෙස දැනුම් දෙනු ලැබිණි.
මිනිත්තු කිහිපයක් අනෙක් විනිසුරු විලියම් සල්ස්මාන් සමඟ සාකච්ඡා කිරීමෙන් අනතුරුව, ජෙරාඩ් අබූඩ් සිය මුල් තීරණය වෙනස් කළේය. පන්දුව ක්රීඩකයාගේ පිත්තේ නොව හිස් ආවරණයේ වැදී ඇති බවට නිගමනය වීම ඊට හේතු විය. ක්රිකට් ඕස්ට්රේලියා ආයතනය ප්රකාශයක් නිකුත් කරමින් සඳහන් කළේ, නිවැරදි තීරණයකට එළඹීම සඳහා කරුණු පැහැදිලි කර ගැනීමට විනිසුරුවරුන්ට එකිනෙකා සමඟ සාකච්ඡා කිරීමට ක්රීඩා නීති රීති යටතේ අවසර ඇති බවයි. කෙසේ වෙතත්, මෙම සිදුවීමේදී අවසානයේ නිවැරදි තීරණය ලබා දුන්නද, එය වඩාත් ඉක්මනින් සිදු වූවා නම් මැනවැයි ඔවුන් අපේක්ෂා කරන බවද එම ආයතනය සඳහන් කළේය.
විනිසුරුවරයා සිය තීරණය නැවත සලකා බැලීමට හෝ වෙනස් කිරීමට ක්රීඩකයාගේ ක්රියාකලාපය කිසිදු අයුරකින් බල නොපෑ බවත්, තීරණය වෙනස් කිරීමට පෙර විනිසුරුවරයා කිසිදු රූපවාහිනී නැවත පෙන්වීමක් නරඹා නොමැති බවත් ක්රිකට් ඕස්ට්රේලියාව අවධාරණය කළේය. එමෙන්ම, ඇතැම් වාර්තාවල දැක්වෙන පරිදි ග්රීන් දෙවරක් දැවී ගිය ක්රීඩකයෙකු ලෙස නම් නොකළ බවත්, විනිසුරුවරයා දෙවන වරටත් දැවී යෑමේ සංඥාව ලබා දුන්නේ ක්රීඩකයෙකුට මුල් තීරණය පැහැදිලි කිරීම සඳහා පමණක් බවත් එම නිවේදනයේ වැඩිදුරටත් සඳහන් විය.
මෙම සිදුවීම වන විට ලකුණු 20ක් ලබා සිටි ක්රිස් ග්රීන්, පසුව ලකුණු 28ක් ලබා සිටියදී මැතිව් කෙලීගේ පන්දුවකට කැමරන් බැන්ක්රොෆ්ට් අතට උඩ පන්දුවක් ලබා දෙමින් දැවී ගියේය. තරගාවලියේ සමාරම්භක තරගය වූ මෙම තරගයෙන් ලකුණු 74ක ජයක් වාර්තා කිරීමට නිව් සවුත් වේල්ස් කණ්ඩායම සමත් විය.වීඩියෝව පහතින්
Comments
Post a Comment
Your comment will be visible after approval