ශ්‍රී ලංකා HSBC බැංකුව NTB ට විකුණා දමයි

 රුපියල් බිලියන 18ක ගනුදෙනුවක් යටතේ HSBC ශ්‍රී ලංකා බැංකුවේ පාරිභෝගික බැංකුකරණ ව්‍යාපාරය මිලදී ගැනීම සඳහා නේෂන්ස් ට්‍රස්ට් බැංකුව (NTB) එකඟතාවකට පැමිණ තිබේ. හොංකොං ඇන්ඩ් ෂැංහයි බැංකු සංස්ථාවේ (HSBC) ශ්‍රී ලංකා ශාඛාව සමග මේ සඳහා වන විකුණුම් සහ මිලදී ගැනීමේ ගිවිසුමකට ඊයේ (24) දින අත්සන් තැබූ බව නේෂන්ස් ට්‍රස්ට් බැංකුව නිවේදනය කළේය.

මෙම ගනුදෙනුව සඳහා නේෂන්ස් ට්‍රස්ට් බැංකුවේ අධ්‍යක්ෂ මණ්ඩල අනුමැතිය අඟහරුවාදා දිනයේදී හිමිවී ඇති අතර, ඒ සඳහා අවශ්‍ය වන අරමුදල් බැංකුවේ අභ්‍යන්තර මූල්‍ය ප්‍රභවයන් මගින් සපුරා ගන්නා බවත්, එමගින් සියලුම නියාමන අනුපාත නිසි පරිදි පවත්වාගෙන යන බවත් එම බැංකුව සඳහන් කරයි. අදාළ බදු ගෙවීම් ඇතුළුව ගනුදෙනුවේ සමස්ත වටිනාකම රුපියල් බිලියන 18ක් වේ.



ශ්‍රී ලංකා මහ බැංකුවේ නියාමන අනුමැතිය ඇතුළු ගිවිසුමේ සඳහන් අනෙකුත් පූර්ව කොන්දේසි සපුරාලීමෙන් අනතුරුව, 2026 වසරේ මුල් භාගය වන විට මෙම ගනුදෙනුව සම්පූර්ණ කිරීමට අපේක්ෂා කරන බව නේෂන්ස් ට්‍රස්ට් බැංකුව නිකුත් කළ නිවේදනයේ වැඩිදුරටත් දැක්වේ. මෙම අත්පත් කරගැනීම යටතේ HSBC ශ්‍රී ලංකා බැංකුවේ ප්‍රමුඛ පෙළේ ගනුදෙනුකරුවන් (HSBC Premier), ක්‍රෙඩිට් කාඩ්පත්, පාරිභෝගික ණය සේවා සහ ලක්ෂ දෙකකට ආසන්න ගනුදෙනුකාර ගිණුම් ප්‍රමාණයක් නේෂන්ස් ට්‍රස්ට් බැංකුව වෙත පැවරෙනු ඇත.

ගනුදෙනුවේ කොටසක් ලෙස, HSBC ශ්‍රී ලංකා බැංකුවේ පාරිභෝගික බැංකුකරණ අංශයේ දැනට සේවය කරන කාර්ය මණ්ඩලයට නේෂන්ස් ට්‍රස්ට් බැංකුවේ සේවය සඳහා අවස්ථාව ලබා දීමට ද එකඟතාව පළ වී තිබේ.

එමගින් ගනුදෙනුකරුවන් සඳහා සුමට සේවා සංක්‍රාන්තියක් සහතික කෙරෙනු ඇත. මෙම අත්පත් කරගැනීම තුළින් මෙරට ප්‍රමුඛ පෙළේ පාරිභෝගික බැංකුකරණ සේවා සැපයුම්කරුවෙකු ලෙස තම ස්ථානය තවදුරටත් ශක්තිමත් වනු ඇතැයි නේෂන්ස් ට්‍රස්ට් බැංකුව විශ්වාසය පළ කරයි.

මේ අතර, HSBC ශ්‍රී ලංකා බැංකුව තම පාරිභෝගිකයින් වෙත විද්‍යුත් තැපෑලක් මගින් දැනුම් දී ඇත්තේ ගනුදෙනුව අවසන් වන තෙක් බැංකු ගිණුම්, තැන්පතු, ක්‍රෙඩිට් කාඩ්පත් සහ පුද්ගලික ණය ඇතුළු සියලුම සේවාවන් කිසිදු වෙනසකින් තොරව සාමාන්‍ය පරිදි පවත්වාගෙන යන බවයි. මෙම සංක්‍රාන්ති කාලය තුළ නේෂන්ස් ට්‍රස්ට් බැංකුව සහ නියාමන අධිකාරීන් සමග සමීපව කටයුතු කරන බවත්, ప్రస్తుත අවස්ථාවේදී ගනුදෙනුකරුවන් විසින් කිසිදු ක්‍රියාමාර්ගයක් ගැනීමට අවශ්‍ය නොවන බවත් HSBC බැංකුව දන්වා ඇත.



2025 ජූනි මස අවසානය වන විට නේෂන්ස් ට්‍රස්ට් බැංකුවේ රඳවාගත් ඉපැයීම් ප්‍රමාණය රුපියල් බිලියන 62.5ක් ලෙසත්, තැන්පතු පදනම රුපියල් බිලියන 447කට අධික අගයකත් පැවතිණි. මෙම බැංකුවේ විශාලතම කොටස් හිමිකාරීත්වය වන සියයට 56.4ක ප්‍රතිශතයක් ප්‍රමුඛ පෙළේ සමාගමක් වන ජෝන් කීල්ස් හෝල්ඩිංග්ස් සතුව පවතී.