වෛරය නිසා දින්නත් 'කප් එක' නැතිව ජය සැමරූ ඉන්දියාව

 ඩුබායිහිදී පැවති 2025 ආසියානු කුසලාන ක්‍රිකට් තරගාවලියේ අවසන් මහා තරගයෙන් පාකිස්තානය පරාජය කරමින් ඉන්දියාව ශූරතාව දිනා ගත්තද, ඉන් අනතුරුව පැවති කුසලාන ප්‍රදානෝත්සවයේදී පෙර නොවූ විරූ සිදුවීමක් වාර්තා විය. ආසියානු ක්‍රිකට් කවුන්සිලයේ (ACC) සභාපති මෙන්ම පාකිස්තාන ක්‍රිකට් පාලක මණ්ඩලයේ (PCB) සභාපති සහ එරට ස්වදේශ කටයුතු අමාත්‍යවරයා ලෙසද කටයුතු කරන මොහ්සින් නක්වි අතින් ශූරතා කුසලානය භාරගැනීම ඉන්දීය කණ්ඩායම ප්‍රතික්ෂේප කිරීමත් සමග මෙම තත්ත්වය උද්ගත විය.

මෙම ප්‍රතික්ෂේප කිරීම හේතුවෙන් කුසලාන ප්‍රදානෝත්සවය සැලකිය යුතු ලෙස ප්‍රමාද වූ අතර, ඉන්දීය කණ්ඩායම එමිරේට්ස් ක්‍රිකට් පාලක මණ්ඩලයේ උප සභාපතිවරයා අතින් කුසලානය භාරගැනීමට කැමැත්ත පළ කළද, මොහ්සින් නක්වි විසින් ඊට ඉඩ ලබා දී නොමැත. අවසානයේදී, ශූරතා කුසලානය ක්‍රීඩාංගණයෙන් ඉවත් කරනු ලැබූ අතර, ඉන්දීය ක්‍රීඩකයින්ට කුසලානය නොමැතිව සිය ජයග්‍රහණය සැමරීමට සිදුවිය.

මෙම මතභේදාත්මක තත්ත්වය හේතුවෙන් තරගය අවසන් වී පැයකට අධික කාලයක් ත්‍යාග ප්‍රදානෝත්සවය ප්‍රමාද විය. වේදිකාව සකස් කිරීම ප්‍රමාද වෙද්දී, මොහ්සින් නක්වි පිටියේ නිලධාරීන් සමඟ නොසන්සුන් ලෙස සාකච්ඡා කරනු දක්නට ලැබුණු අතර, අවසානයේ නිලධාරියෙකු විසින් ශූරතා කුසලානය කිසිදු පැහැදිලි කිරීමකින් තොරව වේදිකාවෙන් ඉවත් කරගෙන යන ලදී.

අනතුරුව, සත්කාරක විකාශකයාගේ නිවේදක සයිමන් ඩූල් විසින්, "ඉන්දීය ක්‍රිකට් කණ්ඩායම අද රාත්‍රියේ ඔවුන්ගේ ත්‍යාග ලබා නොගන්නා බව ආසියානු ක්‍රිකට් කවුන්සිලය මට දන්වා ඇත," යනුවෙන් ප්‍රකාශ කරමින් උත්සවය අවසන් කරන ලදී.

උත්සවය අතරතුර, කුල්දීප් යාදව්, අභිෂේක් ෂර්මා සහ තිලක් වර්මා වැනි ඉන්දීය ක්‍රීඩකයින් සිය පෞද්ගලික සම්මාන ලබාගැනීම සඳහා වේදිකාවට ගියද, ඔවුන් මොහ්සින් නක්වි නොසලකා හරිමින් අනෙකුත් නිලධාරීන්ගෙන් එම ත්‍යාග ලබා ගත්හ. නක්වි ද ඉන්දීය ක්‍රීඩකයින්ට සුබ පැතීමෙන් වැළකී සිටියේය. කෙසේ වෙතත්, පාකිස්තාන නායක සල්මන් අගා, අනුශූරතා ත්‍යාගය නක්වි අතින් ලබා ගත්තේය.

ඉන්දීය නායක සූර්යකුමාර් යාදව් මෙම සිදුවීම පිළිබඳව සිය කම්පනය පළ කරමින්, වෙහෙස මහන්සි වී දිනාගත් ජයග්‍රහණයකින් පසුව ශූරතා කණ්ඩායමට කුසලානය අහිමි කිරීම කණගාටුදායක බව පවසා තිබිණි. කෙසේ වෙතත්, තරගය අවසන් වූ පසු මතකයේ රැඳෙන්නේ ශූරයන් මිස කුසලානයේ ඡායාරූපයක් නොවන බවද ඔහු පසුව ප්‍රකාශ කළේය. කුසලානය ප්‍රතික්ෂේප කිරීමේ තීරණය ක්‍රීඩා පිටියේදී කණ්ඩායමක් ලෙස ගත් තීරණයක් බවද නායකයා අවධාරණය කළේය.

මේ සම්බන්ධයෙන් දැඩි ස්ථාවරයක සිටින ඉන්දීය ක්‍රිකට් පාලක මණ්ඩලය (BCCI) පවසන්නේ තම රටට එරෙහිව යුද ප්‍රකාශ කර ඇති රටක නියෝජිතයෙකු අතින් කුසලානයක් භාරගත නොහැකි බවයි. මණ්ඩලයේ ලේකම් දේවාජිත් සයිකියා ප්‍රකාශ කළේ, මොහ්සින් නක්වි විසින් කුසලානය සහ පදක්කම් සිය හෝටල් කාමරයට රැගෙන යාම ඉතා බොළඳ ක්‍රියාවක් බවත්, නොවැම්බර් මස ඩුබායිහි පැවැත්වෙන ජාත්‍යන්තර ක්‍රිකට් කවුන්සිල (ICC) හමුවේදී මේ පිළිබඳව දැඩි විරෝධයක් ගොනු කරන බවත්ය.

මෙම ජයග්‍රහණය වෙනුවෙන් ඉන්දීය ක්‍රිකට් පාලක මණ්ඩලය විසින් ක්‍රීඩකයින් සහ සහායක කාර්ය මණ්ඩලය වෙත ඉන්දීය රුපියල් කෝටි 21ක මුදල් ත්‍යාගයක් පිරිනැමීමටද තීරණය කර තිබේ. මෙම තරගාවලිය පුරා ඉන්දියාව සහ පාකිස්තානය අතර පැවති තරග තුනම ජයගැනීමට ඉන්දීය කණ්ඩායම සමත් වීමද විශේෂත්වයකි.