ප්‍රකට Bondi Sands සන්නාමයේ සම නිර්මාතෘ, ඔස්ට්‍රේලියානු බිලියනපතියා යුග දිවියට

 ප්‍රකට Bondi Sands සන්නාමයේ සම නිර්මාතෘ, ඔස්ට්‍රේලියානු ජාතික ෂෝන් විල්සන් සිය පෙම්වතිය වන ටෙස් ෂැනහැන් සමග ලොස් ඇන්ජලීස් නුවරදී අති උත්කර්ෂවත් අයුරින් විවාහ දිවියට ඇතුළත් විය. දින තුනක් පුරා පැවති මෙම මංගල උත්සව මාලාව සඳහා අමුත්තන් 120 දෙනෙකු සහභාගී වී ඇති අතර, ඔවුන් සෙනසුරාදා බෙවර්ලි හිල්ස් හෝටලයේදී විවාහපත් වීමෙන් අනතුරුව නව යුවළ ලෙස ඡායාරූප සඳහා පෙනී සිටින අයුරු දක්නට ලැබිණි.

ඩේලි මේල් පුවත්පත වාර්තා කරන පරිදි මෙම මංගල උත්සවය සඳහා ෂෝන් විල්සන් විසින් ඇමෙරිකානු ඩොලර් මිලියනයක් පමණ වැය කර ඇති බවට රාවයක් පැතිර යයි. ඔහු 2012 වසරේදී බ්ලෙයාර් ජේම්ස් සමග එක්ව Bondi Sands ව්‍යාපාරය ආරම්භ කළ අතර, 2023 වසරේදී එය ජපානයේ Kao සමූහ ව්‍යාපාරයට ඇමෙරිකානු ඩොලර් මිලියන 450ක දැවැන්ත මුදලකට අලෙවි කරන ලදී.



මනාලිය වූ ටෙස් ෂැනහැන් නිරූපිකාවක්, සුවතා ව්‍යවසායිකාවක් මෙන්ම 'Tess Talks' නම් පොඩ්කාස්ට් වැඩසටහන මෙහෙයවන්නියක් ද වේ. ඇය ඉහළ පලුද්දක් සහිත අත් රහිත සේද ගවුමකින් සහ දිගු සලුවකින් සැරසී සිටි අතර, මනාලයා වූ විල්සන් කළු පැහැති කදිම ඇඳුමකින් සහ බෝ ටයි පටියකින් සැරසී සිටියේය. විවාහයෙන් පසු දින කිහිපය ගත කළ ආකාරය පිළිබඳව ෂැනහැන් සිය ඉන්ස්ටග්‍රෑම් ගිණුම ඔස්සේ ඡායාරූප පළ කර තිබූ අතර, එහිදී බෙවර්ලි හිල්ස් හෝටලයේ තල් ගස්වලින් වටවූ සුප්‍රසිද්ධ පිහිනුම් තටාකය ද දැකගත හැකි විය.

Bondi Sands ව්‍යාපාර ගනුදෙනුව අවසන් වීමට මසකට පමණ පෙර, එනම් 2023 වසරේ ජූලි මාසයේදී මෙම යුවළ විවාහ ගිවිස ගත්හ. වසර පහක පෙම් සබඳතාවකින් අනතුරුව ඔවුන් මෙලෙස විවාහ දිවියට ඇතුළත් වූ අතර, කොවිඩ් වසංගතයට පෙර පැවති Bondi Sands උත්සවයකදී ඔවුන් දෙදෙනා ප්‍රථම වරට හමුවී තිබේ. සිය එකම දියණිය වන, මේ වන විට එක් හැවිරිදි වියේ පසුවන රෝමී රේ විල්සන් ද සමග එක්ව තම ප්‍රියතම ස්ථානයකදී විවාහ වීමට ලැබීම පිළිබඳව ෂැනහැන් මීට පෙර සිය සතුට පළ කර තිබිණි.



මෙම විවාහ උත්සවය හුදෙක් තම ආදරය සැමරීමක් පමණක් නොව, තම පවුලේ අයට සහ මිතුරන්ට සුවිශේෂී අත්දැකීමක් ලබාදීම ද අරමුණු කරගත් බව මෙම යුවළ පවසා තිබේ. ඒ අනුව, දින තුන සඳහා එකිනෙකට වෙනස් ප්‍රධාන උත්සව තුනක් සැලසුම් කර තිබූ බවත්, එහි නිර්මාණාත්මක කටයුතු සඳහා තමන් මහත් කැමැත්තක් දැක්වූ බවත් ෂැනහැන් සඳහන් කළාය. නිවසේ සිට වැඩ කිරීම, මව් පදවිය සහ විවාහ මංගල්‍යයේ සූදානම් කිරීම් කටයුතු සමබරව කරගෙන යාම තරමක් අභියෝගාත්මක වූ බවද ඇය වැඩිදුරටත් කියා සිටියාය.

Bondi Sands ව්‍යාපාරයෙන් පසුව තම පවුල සමග වැඩි කාලයක් ගත කිරීමට අවස්ථාව ලැබුණු බව පවසන විල්සන්, නව ව්‍යාපාරික ව්‍යාපෘතියක් සඳහා සූදානම් වෙමින් සිටී. වාර්තාවන අන්දමට ඔහු ලබන වසරේදී සිය පෞද්ගලික කොටස් ආයෝජන සමාගමක් ආරම්භ කිරීමට ඉලක්ක කරගෙන ඇත.