කොළඹ ග්රෑන්ඩ්පාස් ප්රදේශයේ ඊයේ රාත්රියේ සිදුවූ වෙඩි තැබීමකින් 26 හැවිරිදි තරුණයෙක් මියගොස් ඇති බව පොලිස් මාධ්ය ප්රකාශක සඳහන් කරයි. යතුරුපැදියකින් පැමිණි හඳුනාගත නොහැකි පුද්ගලයින් දෙදෙනෙකු විසින් මෙම ප්රහාරය එල්ල කර පසුව පලා ගොස් ඇත.
තුවාල ලැබූ තරුණයා හදිසි ප්රතිකාර සඳහා කොළඹ ජාතික රෝහලට ඇතුලත් කර ඇති නමුත්, ගැඹුරු තුවාල හේතුවෙන් ප්රතිකාර ලබමින් සිටියදී ජීවිතක්ෂයට පත්ව ඇති බව රෝහල් ආරංචි මාර්ග සඳහන් කරයි. මියගිය තරුණයා කැලණිය ප්රදේශයේ පදිංචිකරුවෙකු බව හඳුනාගෙන ඇත.
ප්රහාරය සඳහා රිවෝලවර් වර්ගයේ ගිනි අවියක් භාවිතා කර ඇති බවට මූලික විමර්ශනවලින් අනාවරණය වී ඇති අතර,
වෙඩි තැබීමට හේතුව මෙතෙක් නිශ්චිතව හඳුනාගෙන නොමැති බව පොලිස් ප්රකාශක වැඩිදුරටත් පැවසීය. කෙසේ වෙතත්, අපරාධ විමර්ශන අංශය සහ පොලිස් විශේෂ කාර්ය බලකාය සිද්ධිය සම්බන්ධයෙන් පුළුල් පරීක්ෂණයක් ආරම්භ කර ඇති අතර, චූදිතයින් අත්අඩංගුවට ගැනීමට විශේෂ මෙහෙයුම් කිහිපයක් දියත් කර ඇති බව වාර්තා වේ.
ඊට අමතරව, අද (06) අලුයම 1.38ට පමණ මීගමුව, කුට්ටුදූව ප්රදේශයේ නිවසකට ද වෙඩි තැබීමක් සිදුවී ඇත. මෙම සිද්ධියේදී ද යතුරුපැදියකින් පැමිණි පුද්ගලයින් දෙදෙනෙකු විසින් වෙඩි තබා පලා ගොස් ඇති නමුත්, වාසනාවකට මෙන් කිසිවෙකුට තුවාල සිදු වී නොමැත.
මීගමුව සිද්ධිය සම්බන්ධයෙන් පාර්ශ්ව අතර පැවති මුදල් ආරවුලක් මත මෙම වෙඩි තැබීම සිදුකර ඇති බවට ප්රාථමික විමර්ශනවලදී හෙළි වී ඇති බව මීගමුව පොලිසිය පවසයි. මෙම සිද්ධිය සම්බන්ධයෙන් ද පරීක්ෂණ දියත් කර ඇති අතර, සැකකරුවන් හඳුනාගැනීම සඳහා ආසන්න සීසීටීවී දර්ශන පරීක්ෂා කරමින් සිටින බව පොලිසිය වැඩිදුරටත් සඳහන් කරයි.
මෑත කාලයේ කොළඹ හා තදාසන්න ප්රදේශවල ඇතිවන ප්රචණ්ඩත්වය හා වෙඩි තැබීම් වැඩිවීම සම්බන්ධයෙන් ජනතාව අතර සැලකිය යුතු බියක් ඇති වී තිබේ. පොලිස්පතිවරයා ප්රදේශයේ ආරක්ෂාව තහවුරු කිරීම සඳහා විශේෂ පොලිස් මෙහෙයුම් ක්රියාත්මක කිරීමට උපදෙස් දී ඇති අතර, මෙවැනි සිදුවීම් වැළැක්වීම සඳහා ප්රදේශයේ පොලිස් සංචාර වැඩි කර ඇති බව ද වාර්තා වේ.
Comments
Post a Comment
Your comment will be visible after approval