දිසා විනිසුරු තිලිණ ගමගේගේ සේවය නැවත අත්හිටුවයි

 මොරටුව දිසා විනිසුරු සහ මහේස්ත්‍රාත්වරයා ලෙස කටයුතු කළ තිලිණ ගමගේ මහතාගේ සේවය, අධිකරණ සේවා කොමිෂන් සභාව විසින් නැවත වරක් අත්හිටුවා තිබෙන බව වාර්තා වේ.

ඔහුට එරෙහිව පවතින විෂමාචාර චෝදනා සම්බන්ධයෙන් අධිකරණ සේවා කොමිෂන් සභාව විසින් සිදුකරනු ලබන විමර්ශනයක් හේතුවෙන් මෙම පියවර ගෙන ඇති අතර, ඒ පිළිබඳව ලිඛිතව කරුණු දැක්වීම සඳහා දින 21ක කාලයක් ලබා දී ඇත.

වංචනික ලෙස සකස්කළ බලපත්‍රයක් මත 'සකුරා' නැමැති අලි පැටවෙකු නීතිවිරෝධී ලෙස සන්තකයේ තබාගැනීම තුළින් පොදු දේපළ පනත යටතේ වරදක් සිදුකළ බවට ඔහුට චෝදනා එල්ල වී තිබේ.

මෙම අලි ජාවාරම් සිද්ධිය සම්බන්ධයෙන් අධිකරණ සේවා කොමිසම පසුගිය ජුනි මාසයේදී ඔහුට එරෙහිව චෝදනා පත්‍රයක්ද ගොනු කර තිබිණි.

මීට පෙර, මෙම චෝදනාව සම්බන්ධයෙන් අපරාධ පරීක්ෂණ දෙපාර්තමේන්තුව විමර්ශනයක් ආරම්භ කිරීමෙන් අනතුරුව, 2016 වසරේ මැයි මාසයේදීද අධිකරණ සේවා කොමිසම විසින් තිලිණ ගමගේ මහතාගේ වැඩ තහනම් කරන ලද්දේ ඔහු කොළඹ අතිරේක මහේස්ත්‍රාත්වරයා ලෙස සේවය කරමින් සිටියදීය.

මෙම සිදුවීමට අදාළව නීතිපතිවරයා විසින්ද ඔහුට එරෙහිව අධිචෝදනා 25ක් යටතේ නඩු පවරා ඇති බවද වාර්තා වේ.