2015 වසරේදී පොහොර සංස්ථාවේ සේවය කරමින් සිටියදී අරමුදල් අවභාවිත කිරීමක් සම්බන්ධයෙන් එල්ල වූ දූෂණ චෝදනා මත, වත්මන් බලශක්ති අමාත්‍ය කුමාර ජයකොඩි මහතාට එරෙහිව නීතිමය පියවර ගැනීමට අල්ලස් හෝ දූෂණ චෝදනා විමර්ශන කොමිෂන් සභාව (CIABOC) තීරණය කර ඇතැයි අද දින සන්ඩේ ටයිම්ස් පුවත්පත වාර්තා කර තිබේ.
රුපියල් මිලියන 8ක මුදලක් අවභාවිත කිරීමේ චෝදනාව මත අමාත්‍යවරයාට සහ තවත් දෙදෙනෙකුට එරෙහිව මහාධිකරණයේ නඩු පැවරීමට නියමිතය. මෙම සිදුවීමට අදාළ ටෙන්ඩරය පිරිනැමූ ටෙන්ඩර් මණ්ඩලයේ ප්‍රධානියා ලෙස ජයකොඩි මහතා කටයුතු කර තිබේ.
මෙම ටෙන්ඩරයට අදාළ ගෙවීම් ක්‍රියාවලිය සහ බැඳුම්කරය තැබීම සම්බන්ධයෙන් මතු වූ ගැටලුකාරී තත්ත්වයන් මත විමර්ශන ආරම්භ වී ඇත. සිද්ධිය සම්බන්ධයෙන් මීට පෙර සිදුකර තිබූ විමර්ශනද සැලකිල්ලට ගනිමින් අල්ලස් කොමිසම විසින් පරීක්ෂණ නැවත ආරම්භ කර තිබිණි.
මෙම නඩු පැවරීමත් සමග, වත්මන් රජයේ දූෂණ චෝදනා එල්ල වූ පළමු අමාත්‍යවරයා බවට කුමාර ජයකොඩි මහතා පත්වනු ඇත.
මීට පෙර, දෙමළ ජාතික සන්ධානයේ මඩකලපුව දිස්ත්‍රික් මන්ත්‍රී ෂානකියන් රාසමානික්කම් මහතා පාර්ලිමේන්තුවේදී මෙම ගැටලුව මතු කරමින්, පොහොර සංස්ථාවේ මූල්‍ය වංචාවක් සම්බන්ධයෙන් වැඩ තහනමට ලක්වූ පුද්ගලයෙකු වත්මන් කැබිනට් මණ්ඩලයේ සේවය කරන බවට චෝදනා කර තිබිණි.
පසුගිය රජයේ අමාත්‍යවරුන්ට එරෙහිව දූෂණ නඩු ගණනාවක් ගොනු වෙමින් පවතින පසුබිමක අල්ලස් කොමිසම මෙම පියවර ගෙන තිබීම විශේෂත්වයකි.
Comments
Post a Comment
Your comment will be visible after approval