දේශපාලන හයියෙන් රු. අසූ අට ලක්‍ෂයක් හානි පූර්ණ වන්දි ගත්තැයි චෝදනා – ශෂීන්ද්‍ර රිමාන්ඩ්

 හිටපු පාර්ලිමේන්තු මන්ත්‍රී ශෂීන්ද්‍ර රාජපක්ෂ මහතා ලබන 19 වනදා දක්වා රක්ෂිත බන්ධනාගාරගත කරන ලෙස කොළඹ ප්‍රධාන මහේස්ත්‍රාත් තනුජා ලක්මාලි ජයතුංග මහත්මිය ඊයේ (06) නියෝග කළාය. 'අරගලය' පැවති සමයේදී හානියට පත් වූ බව කියන, මහවැලි අධිකාරියට අයත් ඉඩමක ඉදිකළ අනවසර ගොඩනැගිල්ලක් සඳහා සිය නිල හා දේශපාලන බලය භාවිත කරමින් රුපියල් ලක්ෂ 88කට අධික වන්දි මුදලක්

ලබාගැනීමේ චෝදනාව මත ඔහු මෙලෙස රක්ෂිත බන්ධනාගාරගත කෙරිණි.



ඊයේ (06) උදෑසන නුගේගොඩ පිහිටි සිය නිවසේදී අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන් විසින් සැකකරු අත්අඩංගුවට ගෙන තිබිණි. කොමිසම වෙත රැගෙන ගොස් ප්‍රකාශ සටහන් කර ගැනීමෙන් අනතුරුව, ඔහුව පස්වරුවේ අධිකරණයට ඉදිරිපත් කළ අතර, නඩුව ප්‍රධාන මහේස්ත්‍රාත්වරියගේ නිල මැදිරියේදී විභාගයට ගැනිණි.

අල්ලස් කොමිසම වෙනුවෙන් පෙනී සිටි සහකාර අධ්‍යක්ෂ සුලෝචනා හෙට්ටිආරච්චි මහත්මිය අධිකරණයට දන්වා සිටියේ, 2022 මැයි 09 වන දින ඇතිවූ 'අරගලයේදී' සෙවණගල, කිරිඉබ්බන්වැව ප්‍රදේශයේ මහවැලි අධිකාරියට අයත් ඉඩමක අනවසරයෙන් ඉදිකළ ගොඩනැගිල්ලකට සිදුවූ හානියක් වෙනුවෙන් සැකකරු වන්දි ඉල්ලා ඇති බවයි.

එම දේපළ මහවැලි අධිකාරියට අයත් බැවින් හානිපූර්ණ කාර්යාලය මුලින් වන්දි ගෙවීම ප්‍රතික්ෂේප කර තිබියදී, සැකකරු දේශපාලන බලපෑම් යොදා රුපියල් 8,850,000ක මුදලක් අනුමත කරගෙන ඇති බවට චෝදනා එල්ල විය.

ඒ අනුව, දූෂණය, කුමන්ත්‍රණය සහ පොදු දේපළ පනත යටතේ ගැනෙන සාපරාධී සාවද්‍ය පරිහරණය යන චෝදනා මත සැකකරු අත්අඩංගුවට ගත් බව පැවසුණි. රාජගිරියේ පදිංචි ආර්. එම්. ගුණතිලක නැමැත්තෙකු ජනාධිපති ලේකම් කාර්යාලයට කළ පැමිණිල්ලකට අනුව මෙම විමර්ශනය ආරම්භ වී තිබේ. චෝදනා පොදු දේපළ සම්බන්ධයෙන් වන බැවින් අල්ලස් කොමිසම ඇප ලබාදීමට විරුද්ධ විය.



කෙසේ වෙතත්, සැකකරු වෙනුවෙන් පෙනී සිටි ජ්‍යෙෂ්ඨ ජනාධිපති නීතිඥ අනිල් සිල්වා මහතා, තම සේවාදායකයාට එල්ල වී ඇති චෝදනා පොදු දේපළ පනත යටතට නොගැනෙන බැවින් මහේස්ත්‍රාත් අධිකරණයට ඇප ලබාදීමේ බලය ඇති බවට තර්ක කළේය. එම ඉල්ලීම ප්‍රතික්ෂේප කළ ප්‍රධාන මහේස්ත්‍රාත්වරිය, සැකකාර හිටපු මන්ත්‍රීවරයා රක්ෂිත බන්ධනාගාරගත කිරීමට නියෝග කළාය.