ලන්ඩන් නුවර ගුවන් අනතුරක්

ලන්ඩන් නගරයේ සිට කිලෝමීටර් 58ක් (සැතපුම් 36ක්) පමණ දුරින් පිහිටි ලන්ඩන් සවුත්එන්ඩ් ගුවන්තොටුපොළේදී 2025 ජූලි 13 වැනි ඉරිදා සවස 4:00ට ආසන්න වේලාවේදී කුඩා ගුවන් යානයක් ගොඩනැගීමෙන් පසු වහාම බිම කඩා වැටී ගිනිගෙන ඇත. නෙදර්ලන්තයේ ලෙලිස්ටැඩ් බලා පිටත්ව ගිය බීච් B200 සුපර් කිං එයාර් වර්ගයේ ද්විත්ව ටර්බෝප්රොප් ගුවන් යානය ගුවන්ගත වීමෙන් මොහොතකට පසු මෙම අනතුරට ලක්ව ඇති අතර,

අනතුරින් පසු විශාල ගිනි ගෝලයක් සහ දුම් කුළුණක් දර්ශනය වී තිබේ. 
ගුවන් ගමන් දත්ත සටහන් කරන ෆ්ලයිට්රේඩර්24 වෙබ් අඩවියට අනුව, යානයට ගුවන්ගත වීමෙන් පසු මීටර් 53ක (අඩි 175) උසකට වඩා ඉහළට නැගීමට නොහැකිව බිඳ වැටී ඇත. මගීන් 13 දෙනෙකුට සහ කාර්ය මණ්ඩලයේ දෙදෙනෙකුට ගමන් කළ හැකි මෙම යානයේ, අනතුර සිදුවන අවස්ථාවේදී කොපමණ පිරිසක් සිටියේද යන්න මෙතෙක් නිල වශයෙන් තහවුරු කර නොමැත. මෙම සිදුවීම "බරපතල සිදුවීමක්" ලෙස ගුවන්තොටුපොළ බලධාරීන් විසින් නම් කර ඇති අතර, එය පොදු ගුවන් සේවා ගණයට අයත් යානයක් බවට තහවුරු කර තිබේ.

අනතුර වාර්තා වීමත් සමග එසෙක්ස් පොලිසිය, නැගෙනහිර ඉංගලන්ත ගිලන් රථ සේවාව සහ එසෙක්ස් ප්‍රාන්ත ගිනි නිවීමේ හා ගලවා ගැනීමේ සේවාව ඇතුළු හදිසි සේවා ඒකක රැසක් වහාම එම ස්ථානයට කැඳවා ඇත. සවුත්එන්ඩ්, රේලි වෙයාර්, සහ බැසිල්ඩන් යන ප්‍රදේශවලින් ගිනි නිවන රථ කිහිපයක් ද, දුෂ්කර භූමි සඳහා යොදාගන්නා විශේෂ වාහන ද මෙම මෙහෙයුම සඳහා යොමු කර තිබිණි. ඊට අමතරව, ගිලන් රථ හතරක්,

අන්තරායකර ප්‍රදේශ සඳහා වූ ප්‍රතිචාර කණ්ඩායම් හතරක්, සහ එසෙක්ස් සහ හර්ට්ස් ගුවන් ගිලන් රථ සේවාව ද ක්ෂණිකව ක්‍රියාත්මක විය.

මහජන ආරක්ෂාව තහවුරු කිරීමේ පියවරක් ලෙස, අනතුර සිදුවූ ස්ථානයට ආසන්නයේ පිහිටි රොච්ෆර්ඩ් හන්ඩ්රඩ් ගොල්ෆ් ක්‍රීඩා සමාජය සහ වෙස්ට්ක්ලිෆ් රග්බි ක්‍රීඩා සමාජය වැනි ස්ථානවල සිටි ජනතාව ඉවත් කිරීමට බලධාරීන් කටයුතු කළේය. හදිසි සේවාවලට බාධාවකින් තොරව සිය රාජකාරි ඉටු කිරීමට ඉඩ සලසනු පිණිස, එම ප්‍රදේශයෙන් ඉවත්ව සිටින ලෙස එසෙක්ස් පොලිසිය ජනතාවගෙන් ඉල්ලීමක් කළේය.

මෙම සිදුවීම ගුවන්තොටුපොළේ දෛනික මෙහෙයුම් කටයුතුවලට දැඩි බලපෑමක් එල්ල කළ අතර, ඊසිජෙට් ගුවන් සේවයට අයත් ගුවන් ගමන් හතරක් අවලංගු කිරීමට සිදුවිය. පැරිස්, ඇලිකන්තේ, ෆාරෝ සහ පාල්මා ඩි මජෝර්කා යන නගර බලා පිටත්වීමට නියමිතව තිබූ ගුවන් ගමන් එලෙස අවලංගු කෙරිණි. හදිසි සේවා මෙහෙයුම් අවසන් වන තුරු, ප්‍රාදේශීය සහ ජාත්‍යන්තර ගුවන් ගමන් සඳහා කේන්ද්‍රස්ථානයක් වන සවුත්එන්ඩ් ගුවන්තොටුපොළේ කටයුතු තාවකාලිකව අත්හිටුවන ලදී.



අනතුරින් සිදුවූ හානි හෝ කිසිවෙකුට තුවාල සිදුවූයේද යන්න පිළිබඳව මෙතෙක් තහවුරු කළ තොරතුරක් නිකුත් වී නොමැත. ජාත්‍යන්තර පුවත් සේවා සහ සමාජ මාධ්‍ය ජාලා හරහා මෙම සිදුවීමේ දර්ශන සහ තොරතුරු වේගයෙන් පැතිර ගියද, අනතුරට පත් වූවන්ගේ තත්ත්වය පිළිබඳව නිශ්චිත වාර්තා ලැබී නැත. අනතුරට තුඩු දුන් හේතුව ද තවමත් අභිරහසක්ව පවතින අතර, ඉදිරි දිනවලදී පැවැත්වෙන විමර්ශනවලින් ඒ පිළිබඳ කරුණු අනාවරණය වනු ඇතැයි අපේක්ෂා කෙරේ.

එසෙක්ස් පොලිසිය නිකුත් කළ නිල නිවේදනයක දැක්වුණේ, "සවස 4:00ට මඳක් තිබියදී මීටර් 12ක් පමණ දිග ගුවන් යානයක් සම්බන්ධ සිදුවීමක් පිළිබඳව අපට වාර්තා විය. සියලුම හදිසි සේවා සමඟ අප මේ වනවිටත් එම ස්ථානයේ මෙහෙයුම්වල නිරතව සිටින අතර, මහජනතාව හැකිතාක් එම ප්‍රදේශයෙන් ඉවත්ව සිටින ලෙස කාරුණිකව ඉල්ලා සිටිමු," යනුවෙනි. ප්‍රාදේශීය පාර්ලිමේන්තු මන්ත්‍රී ඩේවිඩ් බර්ටන්-සැම්ප්සන් සිය සහයෝගය පළ කරමින්, "සවුත්එන්ඩ් ගුවන්තොටුපොළේ සිදුවීම පිළිබඳව මා දැනුවත්. කරුණාකර හදිසි සේවාවලට ඔවුන්ගේ කාර්යය ඉටු කිරීමට ඉඩ දෙන්න. මගේ සිතිවිලි මෙම සිදුවීමට සම්බන්ධ සියලු දෙනා සමගයි," යනුවෙන් සමාජ මාධ්‍ය ඔස්සේ සටහනක් තබා තිබිණි.