වත්මන් රජය දූෂණයෙන් තොර බවත්, එබැවින් ශ්රී ලංකාව තුළ ආයෝජනය කිරීම සඳහා විදේශීය ආයෝජකයින්ට මෙය ඉතා සුදුසු කාලයක් බවත් විදේශ කටයුතු අමාත්ය විජිත හේරත් මහතා ඊයේ ප්රකාශ කළේය.
ශ්රී ලාංකික ව්යාපාරික සභා ගෝලීය සම්මේලනයේ (GFSLBC) සමාරම්භක වාර්ෂික මහා සභා රැස්වීමට එක්වෙමින් අමාත්යවරයා මේ බව සඳහන් කළේය. දේශපාලනඥයින්ට කොමිස් මුදල් හෝ අල්ලස් ලබා දීමකින් තොරව ආයෝජකයින්ට දැන් සිය ව්යාපාර කටයුතු ආරම්භ කළ හැකි බවත්, ජනතාවට තම විදේශ විනිමය ශ්රී ලංකාව තුළ ආයෝජනය කළ හැකි බවත් ඔහු පෙන්වා දුන්නේය.
ජනාධිපති අනුර කුමාර දිසානායක මහතා ද මෙම අවස්ථාවට සහභාගී වී සිටියේය.
කෙසේ වෙතත්, ආයෝජකයින් සඳහා වන බදු සහන වහාම ලබා දිය නොහැකි බවත්, ඒ සඳහා යම් කාලයක් ගතවනු ඇති බවත් අමාත්යවරයා එහිදී සඳහන් කළේය. නව රජය බලයට පත්වීමෙන් පසු ශ්රී ලංකාවේ ආර්ථික හා දේශපාලන තත්ත්වය වඩාත් ස්ථාවර වී ඇති නමුත්, එය පූර්ණ ස්ථාවරත්වයක් නොවන බව පිළිගත් ඒ මහතා, පෙර පැවති තත්ත්වයට සාපේක්ෂව දූෂණය සහ සොරකම් අඩු වී ඇති බව පැවසීය. රට වෙනස් කර ජනතා ජීවිතය නගා සිටුවීමට රජය දැඩි උත්සාහයක් දරන නමුත්, එය තනිව කළ නොහැකි බවත්, ඒ සඳහා ව්යාපාරික ප්රජාවේ සහ මහජනතාවගේ සහයෝගය අත්යවශ්ය බවත් ඔහු අවධාරණය කළේය.
ඇමරිකානු වෙළෙඳපොළ සඳහා වන බද්ද පෙර පැවති 44% සිට 30% දක්වා අඩු කර ඇති බවද අමාත්යවරයා මෙහිදී හෙළි කළේය. එම ප්රතිශතය තවමත් ඉහළ මට්ටමක පවතින බව සඳහන් කළ ඒ මහතා, එය තවදුරටත් අඩු කර ගැනීම සඳහා ජනාධිපති දිසානායක මහතා එක්සත් ජනපදයේ ඉහළ පෙළේ වෙළෙඳ නියෝජිතයින් සමඟ සාකච්ඡා කිරීමට නියමිත බවද පැවසීය.
තවද, ද්විපාර්ශ්වික ණය ප්රතිව්යුහගත කිරීමේ කටයුතු සියල්ලම පාහේ අවසන් කර ඇති බවද විජිත හේරත් මහතා වැඩිදුරටත් සඳහන් කළේය.
ශ්රී ලාංකික ව්යාපාරික සභා ගෝලීය සම්මේලනයේ මෙම සමාරම්භක වාර්ෂික මහා සභා රැස්වීමේදී, එහි ප්රථම විධායක කමිටුවද නිල වශයෙන් ප්රකාශයට පත් කරන ලදී.
Comments
Post a Comment
Your comment will be visible after approval