හිටපු නි. ඇමැති සාලින්ද කොමිසමේ ඉඩමක් බිරියගේ සමාගමට බදුදීලා

ඉඩම් හා වාරි මාර්ග නියෝජ්‍ය අමාත්‍ය සුසිල් රණසිංහ මහතා පාර්ලිමේන්තුවේදී කරන ලද හෙළිදරව්වක් අනුව, හිටපු ඉඩම් නියෝජ්‍ය අමාත්‍ය සාලින්ද දිසානායක මහතා ඉඩම් ප්‍රතිසංස්කරණ කොමිෂන් සභාවට අයත් අක්කර 76ක ගොඩ මඩ ඉඩමක් 2000 වර්ෂයේදී කෘෂිකර්ම අමාත්‍යාංශයට පවරා,

සිය බිරිඳ සභාපති ධුරය දරන ලද හිරියාල ගොවි සමාගමට බදු දී ඇත. කෙසේ වුවද, වසර 25ක කාලයක් තුළ මෙම ඉඩම වෙනුවෙන් කිසිදු බදු මුදලක් රජයට ගෙවා නොමැති බව ඊයේ (19) දින පාර්ලිමේන්තුවේදී හෙළි කරන ලදී.



නියෝජ්‍ය අමාත්‍ය රණසිංහ මහතාගේ ප්‍රකාශයට අනුව, මෙම ඉඩම හිරියාල සමාගමට බදු දීමෙන් අනතුරුව, එම සමාගම විසින් තවත් පාර්ශව ගණනාවකට අතුරු බදු දී ඇති අතර, එමගින් ලාභ උපයා ඇත. එහෙත් මෙම ඉඩම හරහා රටේ ආර්ථිකයට කිසිදු දායකත්වයක් ලැබී නොමැති අතර, රජයට ගෙවිය යුතු බදු මුදල් ද ලැබී නොමැත.

"මෙම ඉඩම රජයට නැවත පවරා ගැනීම සම්බන්ධයෙන් ගැටලු මතුව ඇති බැවින්, මේ පිළිබඳව සොයා බැලීමට කමිටුවක් පත් කර ඇති අතර, දැනට ඒ සම්බන්ධයෙන් විමර්ශන සිදු කරමින් පවතී," යැයි නියෝජ්‍ය අමාත්‍ය රණසිංහ මහතා පැවසීය.

වැඩිදුරටත් කරුණු දක්වමින්, ඔහු පැවසුවේ ඉඩම් කොමසාරිස්වරයාගේ අනුමැතිය ඇතිව මෙම ඉඩම ලංකා පුත්‍ර බැංකුවට උකස් කර ඇති නමුත්, එම උකසින් ලබාගත් ණය මුදල් ද ගෙවා නොමැති බවයි. ඒ අනුව, මෙම ඉඩම දැනට බැංකුවට සින්නක්කර වී ඇති බව ද ඔහු පැවසීය.

"මේ සිද්ධිය පිටුපස ඇමැතිවරුන්, ජනාධිපතිනිය, ජනාධිපතිතුමා සහ හිටපු ඉඩම් කොමසාරිස්තුමා යන සියලු දෙනා සම්බන්ධ වී සිටිනවා.

මෙය සුදු ඇඳුම් ඇඳ, ටයි පටි පැළඳ, ඇමැති පුටුවල වාඩි වී, ලිපි ලේඛන අත්සන් කරමින් සිදු කරන වංචාවක්. මේවා නීතිය හමුවට ගෙන ගොස් ඔප්පු කිරීමේ හැකියාව පිළිබඳව මා සැක සහිතයි. මෙය සුදු කරපටි වංචාවල ස්වභාවයයි," යැයි නියෝජ්‍ය අමාත්‍ය සුසිල් රණසිංහ මහතා අවධාරණය කළේය.

ඔහු තවදුරටත් පැවසුවේ, "මෙවැනි ඉඩම් ලබා ගන්නේ ආයෝජන සඳහා නොව, හුදෙක් කෙටි කාලීන ලාභ ලැබීම සඳහා පමණයි. මෙවැනි ඉඩම් ගනුදෙනු සලකා බලන විට, මේ රට තවමත් පැවතීම පුදුමයක්. මෙම ඉඩම සංවර්ධනය කිරීම සඳහා ආයෝජන මණ්ඩලය කෝටි පහකට වැඩි මුදලක් වැය කර ඇතත්, ඉඩමෙන් සත පහක බදු මුදලක්වත් රජයට ලැබී නොමැත."

මෙම හෙළිදරව්ව රටේ රාජ්‍ය දේපළ පරිහරණය පිළිබඳව බරපතල ගැටලු මතු කරන අතර, ඉදිරියේදී මෙවැනි වංචා වැළැක්වීම සඳහා විධිමත් ක්‍රියාමාර්ග ගැනීමේ අවශ්‍යතාව පෙන්නුම් කරයි. ඉඩම් හා වාරි මාර්ග අමාත්‍යාංශය විසින් මේ සම්බන්ධයෙන් විශේෂ විමර්ශනයක් ආරම්භ කර ඇති බව ද වාර්තා වෙයි.