වයස 15 දැරිය ගැභිනියක කළ සැකකරුවන් දෙදෙනෙකු අත්අඩංගුවට

ඌරුබොක්ක පොලිසිය විසින් වයස අවුරුදු 15 දැරියක් නීත්‍යානුකූල භාරකාරිත්වයෙන් අපහරණය කර බරපතළ අපයෝජනයක් සිදු කිරීම සම්බන්ධයෙන් තරුණයන් දෙදෙනෙකු අත්අඩංගුවට ගෙන ඇති අතර තවත් තරුණයෙකු සම්බන්ධයෙන් පරීක්ෂණ පවත්වමින් සිටින බව වාර්තා වේ. 

ජාතික ළමාරක්ෂක අධිකාරිය විසින් කරන ලද දැනුම්දීමකට අනුව, ළමා හා කාන්තා කාර්යාංශයේ ස්ථානාධිපති උප පොලිස් පරීක්ෂක දේවිකා මහත්මිය ඇතුළු නිලධාරීන් කණ්ඩායමක් මෙම සිද්ධිය සම්බන්ධයෙන් පරීක්ෂණ ආරම්භ කර ඇත. පරීක්ෂණවලින් හෙළි වූ කරුණු අනුව, මෙම බාල වයස්කාර දැරිය ගැබිනියක් කිරීම සම්බන්ධයෙන් සැකකරුවන් සොයා පරීක්ෂණ ආරම්භ කර ඇත.



පරීක්ෂණවලදී අනාවරණය වූ පරිදි, දැරිය විසින් කළ වීඩියෝවක් ටික්ටොක් සමාජ මාධ්‍ය ජාලයට මුදා හැර තිබෙන අතර, එම වීඩියෝව දුටු තණමල්විල ප්‍රදේශයේ වයස අවුරුදු 17ක තරුණයෙකු දැරිය සමඟ සම්බන්ධතාවයක් ඇති කර ගෙන තිබේ. මෙම ප්‍රේම සම්බන්ධතාවය මාස දෙක තුනක් පැවැති අතර, තරුණයා දැරියට හමුවීම සඳහා පැමිණෙන ලෙස දන්වා ඇති බව පොලිසිය සඳහන් කරයි.

ඒ අනුව පසුගිය දිනෙක දැරිය කොළඹ කොටුවට ගොස් ඇති අතර, තරුණයා දැරිය කිරිබත්ගොඩ ප්‍රදේශයේ බෝඩිමකට රැගෙන ගොස් ඇත. ඔවුන් පළමු දින රාත්‍රිය එහි ගත කර දෙවැනි දින හෝමාගම ප්‍රදේශයේ බෝඩිමකට ගොස් ඇති බව පොලිසිය හෙළි කරයි. රැකියාවක් සොයා ගැනීමට නොහැකි වීම නිසා, ඔවුන් දෙදෙනා කටුවන ප්‍රදේශයට පැමිණ සිටියදී, තරුණයාගේ මවගේ දැනුම් දීමට අනුව දෙදෙනා තණමල්විල මවගේ නිවෙසට ගොස් ඇත.

කෙසේ වෙතත්, දැරියගේ වයස සම්පූර්ණ නොවීම නිසා තරුණයාගේ මව විසින් දැරිය නැවත ඌරුබොක්කේ ඇයගේ නිවෙසට යවා ඇති බව වාර්තා වේ. නිවෙසට පැමිණ සිටි දැරියට ඇති වූ අපහසුතා නිසා ඒ බව ඇය පෙම්වතාට දැනුම් දී ඇති අතර, දැරිය මුත්‍රා පරීක්ෂණයක් සිදු කර ගැනීමෙන් පසු අනාවරණය වී ඇත්තේ ඇය ගැබ්ගෙන ඇති බවයි. ඒ අනුව, දැරිය ගැබිනියක් කළ පළමු පෙම්වතා අත්අඩංගුවට ගැනීමට පොලිසිය කටයුතු කර ඇත.

තවද, 2025 අප්‍රේල් 01 වන දින දැරිය දාපනේ ප්‍රදේශයේ වයස අවුරුදු 17ක තවත් තරුණයෙකු සමඟ ප්‍රේම සම්බන්ධයක් ඇති කරගෙන ඇති බවත්,

එම තරුණයා විසින් දැරිය ඌරුබොක්ක ප්‍රදේශයේ ලැගුම්හලකට රැගෙන ගොස් ඇති බවත් මූලික විමර්ශනවලදී අනාවරණය වී ඇත. මේ අනුව, දෙවන පෙම්වතා ද පොලිසිය විසින් අත්අඩංගුවට ගෙන ඇත.

පොලිසිය වැඩිදුරටත් සඳහන් කරන්නේ, 2021 වර්ෂයේදී මෙම දැරිය වෙනත් තරුණයෙකු අතින් අපයෝජනයට ලක්ව ඇති බවත්, එම තරුණයා මේ වන විට ප්‍රදේශයෙන් පලා ගොස් ඇති බවත්ය.

දැරිය ගැබිනියක් කළ බව කියන තරුණයන් දෙදෙනා මොරවක මහෙස්ත්‍රාත් අධිකරණයට ඉදිරිපත් කිරීමෙන් පසු, මොරවක මහෙස්ත්‍රාත් දිසා විනිසුරු කෝසලා අනුරුද්ධිකා විදාන පතිරණ මහත්මිය විසින් ඔවුන් දින 14ක කාලයක් සඳහා රක්ෂිත බන්ධනාගාර ගත කිරීමට නියෝග කර ඇත.

අත්අඩංගුවට ගත් සැකකරුවන් දෙදෙනාම වයස අවුරුදු 17ක තරුණයන් වන අතර, ඌරුබොක්ක පොලිස් ස්ථානාධිපති ප්‍රධාන පොලිස් පරීක්ෂක ටී.පී.ඩබ්. පල්ලියගුරුගේ මහතාගේ උපදෙස් මත, පැමිණිල්ල වෙනුවෙන් කොස්තාපල් දනුෂ්ක (78230) මහතා අධිකරණයට කරුණු දක්වමින් පෙනී සිටියේය.

ළමා අපයෝජන සම්බන්ධ මෙවැනි සිද්ධීන් වැළැක්වීම සඳහා වැඩි අවධානයක් යොමු කිරීමේ අවශ්‍යතාවය මෙම සිද්ධිය මගින් පෙන්නුම් කරන අතර, සමාජ මාධ්‍ය ජාල හරහා ළමුන්ට එල්ල විය හැකි අවදානම් සම්බන්ධයෙන් දෙමාපියන් හා භාරකරුවන් විසින් අවධානයෙන් සිටීමේ වැදගත්කම ද මෙමගින් අවධාරණය කෙරේ.