කොම්පඤ්ඤවීදියේ පිහිටි සුඛෝපභෝගී හෝටලයක 22 වන මහලේ කාමරයක නවාතැන් ගෙන සිටියදී මියගිය චීන ජාතික ෂූ චෙන්ග් ගැන්ග් (Shu Cheng Gang) නැමැති පුද්ගලයාගේ දේහය ඔහුගේ බිරිය වන ෂූ චෙන්ග් සියැන්ග් මහත්මියට භාර දීමටත්, එම දේහය චීනයට රැගෙන යාමටත් කොටුව වැඩබලන මහේස්ත්රාත් කිංස්ලි හෙට්ටිආරච්චි මහතා අවසර ලබා දී ඇත.
මේ සම්බන්ධයෙන් කරන ලද මරණ පරීක්ෂණයට අදාළ වාර්තාව 2025 මාර්තු මස 03 වැනි දින අධිකරණයට ඉදිරිපත් කරන ලෙස මහේස්ත්රාත්වරයා කොම්පඤ්ඤවීදිය පොලීසියට නියෝග කර තිබේ.
මියගිය චීන ජාතිකයාගේ මරණය සම්බන්ධයෙන් මරණ පරීක්ෂණය කොළඹ ජාතික රෝහලේ අධිකරණ වෛද්ය නිලධාරි දුලාන් බලල්ල මහතා විසින් සිදු කරන ලදී. මෙම මරණ පරීක්ෂණය සඳහා මියගිය පුද්ගලයාගේ බිරිය, නවාතැන්ගෙන සිටි හෝටලයේ කළමනාකාරවරයා, යාබද කාමරවල නවාතැන් ගෙන සිටි අනෙකුත් චීන ජාතිකයන් සහ හෝටල් සේවකයන් ඇතුළු පුද්ගලයින් හත් දෙනෙකුගෙන් පමණ ප්රකාශ ලබාගෙන ඇති බව කොම්පඤ්ඤවීදිය පොලීසියේ සුළු පැමිණිලි අංශයේ ස්ථානාධිපති වීරසූරිය මහතා දිනමිණ පුවත්පතට ප්රකාශ කර ඇත.
මියගිය චීන ජාතිකයා නවාතැන් ගෙන සිටි සුඛෝපභෝගී හෝටලයේ 22 වැනි මහලේ පිහිටි සිද්ධිය සිදු වූ ස්ථානය නිරීක්ෂණය කිරීම සඳහා කොටුව වැඩබලන මහේස්ත්රාත් කිංස්ලි හෙට්ටිආරච්චි මහතා පසුගිය ෆෙබරවාරි 24 වැනි දින එම ස්ථානයට ගොස් අවශ්ය නියෝග ලබා දී ඇත.
මියගිය චීන ජාතිකයාගේ මළ සිරුර හමු වී ඇත්තේ ඔහු නවාතැන් ගෙන සිටි හෝටලයේ 22 වැනි මහලේ කාමරය තුළදී පසුගිය ෆෙබරවාරි 24 වැනි දින සවස් කාලයේදී ය. වාර්තා වන අනුව, මියගිය චීන ජාතිකයා ශ්රී ලංකාවේ සමාගමක සේවයේ නියුතුව සිටි පුද්ගලයෙකි.
මෙම සිද්ධිය සම්බන්ධයෙන් තවදුරටත් පරීක්ෂණ පැවැත්වෙන අතර, මාර්තු 03 වැනි දින ඉදිරිපත් කිරීමට නියමිත මරණ පරීක්ෂණ වාර්තාව තුළින් මරණයට හේතුව තවදුරටත් පැහැදිලි වනු ඇත.
