කොළඹ ප්රධාන මහේස්ත්රාත් තනූජා ලක්මාලි මහත්මිය විසින් ගිරිබාව පොලිසියේ සැරයන්වරයෙකු රුපියල් විසිදහසක අල්ලසක් ඉල්ලා සිටි චෝදනාව මත ලබන 18 වැනිදා දක්වා රක්ෂිත බන්ධනාගාරගත කිරීමට නියෝග කර තිබේ.
සිද්ධියේ විස්තර අනුව, මෙම පොලිස් නිලධාරියා තම බිරිඳට එරෙහිව පවරා ඇති වන්දි නඩුවකට අදාළ වරෙන්තුවක් ක්රියාත්මක කිරීම සඳහා පැමිණිලිකරුගෙන් රුපියල් 20,000ක අල්ලසක් ඉල්ලා ඇති බව අල්ලස් හෝ දූෂණ චෝදනා විමර්ශන කොමිසම අධිකරණයට වාර්තා කර ඇත.
චෝදනාවට ලක්ව සිටින සැකකරු ටී. රාජගුරු නමැති සැරයන්වරයා ගිරිබාව පොලිසියේ සේවය කරමින් සිටියදී මෙම සිද්ධියට සම්බන්ධ වී ඇත.
පැමිණිලිකරු වන්නේ දරුවන් තිදෙනෙකුගේ පියෙකු වන අතර, ඔහුගේ බිරිඳ දරුවන් සමඟ නිවස හැර ගොස් ඇති බවත්, ඒ සම්බන්ධයෙන් පවරා ඇති වන්දි නඩුවකට අදාළ වරෙන්තුවක් මත බිරිය අල්ලා දීමට අවශ්ය නම් අල්ලස් ගෙවන ලෙසසැරයන්වරයා දන්වා ඇත.
අල්ලස් කොමිසමේ නිලධාරීන් අධිකරණයට ඉදිරිපත් කළ වාර්තාවේ සඳහන් වන පරිදි, සැකකරු පැමිණිලිකරුට තර්ජනය කර ඇත්තේ අල්ලස් මුදල නොගෙවන්නේ නම් නීති විරෝධී ක්රියාවක් සම්බන්ධයෙන් ඔහුට එරෙහිව නඩු පැවරීමට කටයුතු කරන බවටද පවසා ඇත.
මෙම තර්ජනයත් සමඟ පැමිණිලිකරු අල්ලස් කොමිසමට පැමිණිල්ලක් ඉදිරිපත් කර ඇති අතර, ඒ අනුව සිදු කළ වැටලීමකදී සැකකරු අත්අඩංගුවට ගෙන තිබේ.
අල්ලස් කොමිසමේ නිලධාරීන් අධිකරණයට දැනුම් දුන් පරිදි, මෙම සිද්ධිය සම්බන්ධයෙන් තවදුරටත් විමර්ශන සිදු කෙරෙමින් පවතින බැවින් සැකකරු රිමාන්ඩ් භාරයට පත් කිරීම අවශ්ය බව පවසා තිබේ.
සියලු කරුණු සැලකිල්ලට ගනිමින් කොළඹ ප්රධාන මහේස්ත්රාත්වරිය සැකකරු රක්ෂිත බන්ධනාගාරගත කිරීමට නියෝග කර ඇති අතර, ලබන 18 වැනිදා නැවත නඩුව කැඳවන විට සිද්ධියට අදාළ විමර්ශනවල ප්රගතිය වාර්තා කරන ලෙස අල්ලස් කොමිසමට නියෝග කර තිබේ.
Comments
Post a Comment
Your comment will be visible after approval