පන්නිපිටිය ධර්මපාල විද්‍යාලයේ පිහිටුවා ඇති අධ්‍යයන පොදු සහතික පත්‍ර උසස් පෙළ විභාග පිළිතුරුපත් ඇගයීම් මධ්‍යස්ථානයේ සිදුවූ ආරවුලක් හේතුවෙන් එම මධ්‍යස්ථානය තාවකාලිකව වසා දැමීමට විභාග කොමසාරිස් ජනරාල්වරයා ඊයේ (16) දින තීරණය කළේය.

සිද්ධියට අදාළ වාර්තා අනුව, පිළිතුරුපත් ඇගයීමට පැමිණි ගුරුවරියන් පිරිසක් ගවුම් ඇඳ පැමිණීම හේතුවෙන් පාසලේ විදුහල්පතිනිය විසින් ඔවුන් පාසල් භූමියට ඇතුළු කර ගැනීම ප්‍රතික්ෂේප කිරීමෙන් මෙම ගැටුම්කාරී තත්ත්වය උද්ගත වී ඇත.



පාසලේ ආරක්ෂක අංශය පවසා සිටියේ පාසල් පැවැත්වෙන දිනයක් වන හෙයින් ගුරුවරියන් සාරි ඇඳගෙන පැමිණිය යුතු බවත්, මෙය විදුහල්පතිනියගේ නියෝගයක් බවත්ය. කෙසේ වෙතත්, පිළිතුරුපත් ඇගයීමට පැමිණි ගුරුවරියන් තර්ක කර සිටියේ විභාග පිළිතුරුපත් ඇගයීම් මධ්‍යස්ථානයක පාලනය විභාග කොමසාරිස් ජනරාල්වරයා සතු බවත්, ඒ පිළිබඳව විදුහල්පතිනියට කිසිදු බලයක් නොමැති බවත්ය.

විභාග කොමසාරිස් ජනරාල් අමිත් ජයසුන්දර මහතා ප්‍රකාශ කර සිටියේ පාසල් නිවාඩු දිනවල පහසු ඇඳුමින් පැමිණීමට අවසර දී තිබුණද, පාසල් පැවැත්වෙන දිනවල සාරි ඇඳ පැමිණිය යුතු බව කලින්ම දැනුම් දී තිබූ බවයි. මීට පෙර විදුහල්පතිනිය විසින් ලිපියක් මගින් පාසලේ සංස්කෘතියට ගැළපෙන පරිදි පැමිණිය යුතු බව දන්වා තිබූ බවද ඔහු පැවසීය.



ගැටුම පාලනය කිරීම සඳහා පොලිසිය කැඳවීමට සිදුවූ අතර, පොලිස් මැදිහත්වීමෙන් පසුවද දෙපාර්ශවය අතර එකඟතාවයකට පැමිණීමට නොහැකි වීම හේතුවෙන් විභාග කොමසාරිස් ජනරාල්වරයා දුරකථනය ඔස්සේ උපදෙස් දී ඇත්තේ මධ්‍යස්ථානය දින තුනකට වසා දමන ලෙසයි.

ජයසුන්දර මහතා වැඩිදුරටත් පැවසූ පරිදි, ඇතැම් ගුරුවරියන් සහ ගුරුවරුන් පාසලේ ආරක්ෂක අංශය මග හරිමින් බලහත්කාරයෙන් පාසල් පරිශ්‍රයට ඇතුළු වීමට උත්සාහ කර ඇත. කෙසේ වෙතත්, අද (17) දින ගුරුවරියන් නිසි පරිදි රාජකාරියට පැමිණියහොත් මධ්‍යස්ථානයේ කටයුතු යථා පරිදි ආරම්භ කරන බව ඔහු සඳහන් කළේය.

මෙම සිද්ධිය සම්බන්ධයෙන් අද දින විශේෂ තීරණයක් ගැනීමට නියමිත බව විභාග දෙපාර්තමේන්තු ආරංචි මාර්ග සඳහන් කරයි. 2024 අධ්‍යයන පොදු සහතික පත්‍ර උසස් පෙළ විභාගය ප්‍රමාද වී පැවැත්වූ අතර, දැනට එහි පිළිතුරුපත් ඇගයීම් කටයුතු සිදු කෙරෙමින් පවතී.

ඊයේ දිනට නියමිතව තිබුණේ සංයුක්ත ගණිත විෂයේ පිළිතුරුපත් ඇගයීමයි.

මෙම සිද්ධිය හේතුවෙන් විභාග ප්‍රතිඵල නිකුත් කිරීමේ කාලසටහනට බලපෑමක් සිදුවිය හැකි බවට සැලකිය යුතු මට්ටමේ කතිකාවක් ද පවතී. කෙසේ වෙතත්, විභාග දෙපාර්තමේන්තුව විසින් විකල්ප පියවර ගැනීමට සූදානම්ව සිටින බව වාර්තා වේ.

මේ අතර, අධ්‍යාපන අමාත්‍යාංශය සහ විභාග දෙපාර්තමේන්තුව එක්ව මෙවැනි සිදුවීම් වැළැක්වීම සඳහා විධිමත් ක්‍රියාමාර්ග සකස් කිරීමේ අවශ්‍යතාව පිළිබඳව අවධානය යොමු කර ඇති බව ද වාර්තා වේ.