හිටපු ඉන්දීය ක්රිකට් ක්රීඩක වීරේන්ද්ර සේවාග් සහ ඔහුගේ බිරිඳ ආර්ති අහ්ලවාත් අතර පවතින වසර විස්සක විවාහ ජීවිතය දික්කසාදයකින් අවසන් වීමට ආසන්නව ඇති බවට වාර්තා පළවෙමින් පවතී. මෑත කාලීන මාධ්ය වාර්තා අනුව, දෙදෙනා මාස කිහිපයක සිට වෙන් වී ජීවත් වන බව සඳහන් වේ.
මෙම කටකතා තවදුරටත් තහවුරු වන්නේ දෙදෙනාම ඉන්ස්ටග්රෑම් සමාජ මාධ්ය ජාලයෙන් එකිනෙකා අනුගමනය කිරීම නවතා ඇති බවට ලැබෙන වාර්තා හරහාය. විශේෂයෙන්ම ආර්ති අහ්ලවාත් තම සමාජ මාධ්ය ගිණුම පෞද්ගලික තත්ත්වයට පත් කර ඇති අතර, මෙය ඔවුන්ගේ සබඳතාවයේ ප්රශ්න මතුවීමට හේතු වී ඇති බව විශ්ලේෂකයෝ පෙන්වා දෙති.
2024 දීපාවලී උත්සවය ඇතුළු වැදගත් පවුල් අවස්ථාවන්හිදී පවා සේවාග් විසින් ආර්ති සමඟ කිසිදු ඡායාරූපයක් සමාජ මාධ්ය ඔස්සේ බෙදාගෙන නොමැත. ඔහුගේ සමාජ මාධ්ය පළකිරීම්වල ඔවුන්ගේ පුත්රයන් වන ආර්යවීර් සහ වේදාන්ත් පමණක් දක්නට ලැබේ.
සේවාග් සහ ආර්ති අතර ආදර සබඳතාවය ළමා කාලයේ සිටම ආරම්භ වී ඇති අතර, 2004 වසරේ අප්රේල් මාසයේදී ඔවුන්ගේ විවාහ මංගල්යය අති උත්කර්ෂවත් ලෙස පැවැත්විණි. මෙම විවාහ උත්සවය හිටපු බීජේපී නායක දිවංගත අරුන් ජේට්ලි මහතාගේ නිවසේදී දැඩි ආරක්ෂක වැඩපිළිවෙලක් යටතේ පැවැත්වුණි.
සේවාග් 1999 වසරේදී ඉන්දීය එක්දින ක්රිකට් කණ්ඩායමට එක්වූ අතර, 2001 දී ටෙස්ට් කණ්ඩායමට ඇතුළත් විය. ඔහු තම යුගයේ විශිෂ්ටතම ප්රහාරක පිතිකරුවන් අතරින් කෙනෙකු ලෙස සැලකේ. ඉන්දීය කණ්ඩායමේ උප නායකයා ලෙසද කටයුතු කළ සේවාග්, ප්රධාන නායකයාගේ අවශ්යතාවය මත වැඩබලන නායක ලෙසද සේවය කර ඇත.
ඉන්දීය ප්රීමියර් ලීග් තරඟාවලියේදී දිල්ලි කැපිටල්ස් (එවකට දිල්ලි ඩෙයාර්ඩෙවිල්ස්) කණ්ඩායම නියෝජනය කළ ඔහු, දේශීය ක්රිකට් තරඟාවලි සඳහා දිල්ලි සහ හරියානා කණ්ඩායම් වෙනුවෙන් ක්රීඩා කළේය.
සේවාග් 2002 චැම්පියන්ස් ට්රොෆි ශූරතාවය, 2007 ටී20 ලෝක කුසලානය සහ 2011 එක්දින ලෝක කුසලානය දිනූ ඓතිහාසික ඉන්දීය කණ්ඩායම්වල ප්රධාන සාමාජිකයෙකු විය.
මේ වන තෙක් සේවාග් හෝ ආර්ති විසින් මෙම දික්කසාද කටකතා සම්බන්ධයෙන් කිසිදු නිල ප්රකාශයක් නිකුත් කර නොමැත. කෙසේ වෙතත්, මෙම පුවත ක්රීඩා ලෝලීන් අතර විශාල කතාබහකට ලක්ව ඇති අතර, බොහෝ දෙනා මෙම තත්ත්වය පිළිබඳව කනගාටුව ප්රකාශ කර සිටිති.
මෙම මොවුන්ගේ විවාහ ජීවිතයේ අනාගතය පිළිබඳව තවදුරටත් තොරතුරු අනාවරණය වනු ඇතැයි අපේක්ෂා කෙරේ.
Comments
Post a Comment
Your comment will be visible after approval