නාරාහේන්පිට හැව්ලෝක් නිවාස සංකීර්ණය අසල පිහිටි උද්‍යානපුර, ඇළකණ්ඩිය ප්‍රදේශයේ මළ ගෙදරකදී දෙපිරිසක් අතර ඇති වූ ගැටුමකදී ප්‍රතිවාදී කණ්ඩායමේ අයකු මන්නාවලින් හා කඩුවලින් පහරදී කපා කොටා ඝාතනය කිරීමේ චෝදනාවට වැරදිකරුවන් වූ තොටළඟ ප්‍රදේශයේ ප්‍රබල මත්ද්‍රව්‍ය ජාවාරම්කරුවකු ඇතුළු සංවිධානාත්මක අපරාධකරුවන් 6 දෙනකුට කොළඹ මහාධිකරණය විසින් ඊයේ (29) මරණ දඬුවම නියම කළේය.
මරණ දඩුවම නියමවූවන් නැවත අධිකරණයේ සිට රැගෙන යද්දී හඩා වැලපෙමින් සංවේදී අවස්ථා කිහිපයක් දැකගත හැකි විය.
විත්තිකරුවන්ට එරෙහි චෝදනා පැමිණිල්ල සාධාරණ සැකයකින් තොරව සනාථ කර ඇති බව තීරණය කළ මහාධිකරණ විනිසුරුවරයා චුදිතයන් වැලිකඩ බන්ධනාගාරයට ගෙන ගොස් ජනාධිපතිවරයා තීරණය කරන දිනෙක ප්‍රාණය නිරුද්ධ වන තෙක් ගෙල සිරකර එල්ලා මරා දැමීමට නියම කළේය. මෙලෙස මරණ දඬුවම නියම වූයේ 2016 වසරේ ජූලි 20 වැනිදා නාරාහේන්පිට, ඇළකණ්ඩිය ප්‍රදේශයේ දී මරණ ගෙදරකදී සිදු වූ ආරවුලකදී විදානගේ ආරච්චිලාගේ මංජුල මහේෂ් යන අයගේ මරණය සිදු කිරීමේ චෝදනාවට වැරැදිකරුවන් වූ විත්තිකරුවන් 6 දෙනකුටය.
මියගිය අයගේ මරණය සිදු කළ තැනැත්තා කවරෙක්ද යන්න නඩු විභාගයේදී නිශ්චිතව අනාවරණය නොවූවද විත්තිකරුවන් කඩු, මන්නා ආදිය මඟින් පහරදීමෙන් මරණකරු මියගිය බව සනාථ විය. එමෙන්ම චුදිතයන් පහර දීමට සම්බන්ධ වූ බවට හඳුනාගැනීමේ පෙරට්ටුවේදී සහ සාක්ෂි විභාගයේදී අනාවරණය විය. සංවිධානාත්මක අපරාධයකදී ඝාතනය සිදු කළ තැනැත්තා නිශ්චිතව හඳුනා නොගත්ත ද එම අපරාධයට සම්බන්ධ සියලු දෙනා සාමූහිකව එම වරදට බැඳෙන බව මහාධිකරණ විනිසුරුවරයා පූර්ව නඩු තීන්දු උපුටා දක්වමින් කරුණු දක්වා සිටියේය. ඒ අනුව විත්තිකරුවන් මනුෂ්‍ය ඝාතන චෝදනාවට වරදකරුවන් කිරීමට අධිකරණය තීරණය කළේය.
මියගිය තැනැත්තාට අමතරව විත්තිකරුවන් කළ පහරදීමෙන් තවත් තැනැත්තන් දෙදෙනකු මරණීය තුවාල ලැබුවේය. පහරදීමට කඩු, මන්නා ඇතුළු තියුණු ආයුධ භාවිත කර ඇති බව නඩු විභාගයේ දී අනාවරණය විය. පහරදීමට විත්තිකරුවන්ට අමතරව තවත් නම් නොදන්නා 20 දෙනකු පමණ සහභාගී වී ඇති බව හෙළි විය. මොවුන් සිද්ධිය වූ දින දහවල් 2.00ට පමණ තොටළඟ සිට ත්‍රීවිලර් රථවලින් පැමිණ ඒවා අසල පිහිටි ජාත්‍යන්තර පාසල අසලදී නවත්වා පාගමනින් සිද්ධිය වූ ස්ථානයට පැමිණ ඇත.
අනතුරුව විත්තිකරුවන් කෑකෝ ගසමින් මරණකරුට හා ඔහුගේ පවුලේ අයට කඩු හා මන්නාවලින් පහරදී ඇත. ගැටුම බේරීමට පැමිණි තැනැත්තන්ට ද ගල් මුගුරුවලින් පහර දී ඇති අතර අවට නිවාසවලටද පහර දී ගම්වැසියන් ත්‍රාසය දනවන ආකාරයේ විශාල භීෂණයක් ඇති කර තිබේ. පහරදීම සිදුවන අවස්ථාවේ දී කිසිවකු පොලිස් හදිසි ඇමතුම් අංශයට දුරකතන පණිවුඩයක්දී සිද්ධිය දන්වා තිබේ. ඒ අනුව නාරාහේන්පිට පොලිසියේ ජංගම ජීප් රිය යොමුකර තිබේ. ඒ අවස්ථාවේදී පිරිසක් අත්අඩංගුවට ගනු ලැබූ අතර අනෙක් අය පසුව භාරයට ගන්නා ලදි.
සිද්ධියෙන් පසු රෝහල්ගත කර සිටි මරණකරු දින කිහිපයකට පසු මිය ගියේය.
මත්ද්‍රව්‍ය ගනුදෙනුවක් සම්බන්ධ ආරවුලක් මත නාරාහේන්පිට හා තොටළඟ කල්ලි දෙකක් අතර කාලාන්තරයක සිට පැවැති මතභේදයක් අනුව මෙම ඝාතනය සිදුව තිබේ. මත්ද්‍රව්‍ය ජාවාරමට සම්බන්ධ නම්දරා ඇති අපරාධකරුවන් වන මොවුන්ට මනුෂ්‍ය ඝාතන චෝදනා ඇති බව නඩු විභාගයේදී අනාවරණය විය.
මෙලෙස මරණ දඬුවම නියම වූයේ, පිච්චෙයි වරුණ සම්පත්, අන්තෝනි මුත්තු නැපෝලියන් පීටර් කෲස්, සුන්දර රාජා ප්‍රදීප් කුමාර්, සුන්දර රාජා ගනේෂ් කුමාර්, සුන්දර රාජා ශාන්ත කුමාර නොහොත් සුජීව නොහොත් සුජී, කොක්මාදූවගේ සුරාජ් මධුසංඛ යන එකම පවුලේ සහෝදරයන්, ඥාතීන් ඇතුළු විත්තිකරුවන් 6 දෙනකුටය.
නඩුවේ විත්තිකරුවන් ලෙස නම් කර සිටි සුන්දර රාජ් සසිකුමාර් නොහොත් සුද්දා, කොක්මාදූවගේ ප්‍රියන්ත පුෂ්ප කුමාර නොහොත් මහතුන් යන විත්තිකරුවන් නඩු විභාගය අතරතුරදී මරණයට පත්ව ඇත.
රජයේ අධිනීතිඥ ලිෂාන් රත්නායක මහතා පැමිණිල්ල මෙහෙය වීය. නාරාහේන්පිට පොලිසියේ කොස්තාපල් යසිරු වීරසිංහ මහතා (94534) ලේඛන ඉදිරිපත් කළේය.
(චන්දන ජයවීර)
0 Comments