මුදල් ගෙවා තිබියදීත් මුදල් වංචා කළැයි කියමින් මිනිසුන් අත්අඩංගුවට ගැනීම පිළිබඳව දැඩි ලෙස පොලිසිය දෝෂාරෝපණයට ලක් කළ වැලිසර මහේස්ත්‍රාත් තුසිත ධම්මික උඩුවවිදාන මහතා මුදල් වංචා කළැයි කියමින් සැකපිට අත්අඩංගුවට ගෙන අධිකරණයට ඉදිරිපත් කළ උපුල් ශාන්ත සන්නස්ගල මහතා ඇප මත මුදාහැරීමට ඊයේ (25) නියම කළේය.චිත්‍රපටයක් නිෂ්පාදනය කිරීමට බව පවසා කඳාන ප්‍රදේශයේ පුද්ගලයකුගෙන් රුපියල් ලක්ෂ 10ක මුදලක් ලබාගෙන එම මුදල ආපසු නොදී විශ්වාසය කඩ කරන ලදැයි කියන සිද්ධියක් සම්බන්ධයෙන් කඳාන පොලිසිය විසින් සන්නස්ගල මහතා අත්අඩංගුවට ගෙන අධිකරණයට ඉදිරිපත් කරනු ලැබීය.
සිද්ධියට අදාළව කරන ලද විමර්ශන වල ප්‍රගතිය දැක්වෙන වාර්තාවක් ඉදිරිපත් කළ කඳාන පොලිසියේ නිලධාරීහු චිත්‍රපටයක් නිෂ්පාදනය කිරීමට බව පවසා මාසයක කාලයක් තුළ ගෙවීමේ පොරොන්දුව මිත සැකකරු පැමිණිලි කරුගෙන් රුපියල් ලක්ෂ10ක මුදලක් ලබාගෙන ඇතැයි එම මුදල නියමිත දිනයේදී ආපසු නොදී විශ්වාසය කඩකර ඇතැයිද පැවසූහ.
මේ පිළිබඳ ලැබුණු පැමිණිල්ලකට අනුව සැකකරු අත්අඩංගුවට ගත් බව දැනුම් දුන් කඳාන පොලිසියේ නිලධාරීහු සිද්ධිය සම්බන්ධයෙන් තවදුරටත් විමර්ශන කරන හෙයින් සැකකරු රිමාන්ඩ් කරන්නැයි ඉල්ලා සිටියහ.සැකකරු වෙනුවෙන් පෙනී සිටි නීතිඥවරු කරුණු දක්වමින් තම සේවාදායකයා චිත්‍රපටයක් නිෂ්පාදනය කරන බව දැනගෙන පැමිණිලිකරු රුපියල් ලක්ෂ 10ක මුදලක් දුන්නේ ප්‍රදානයක් වශයෙන් මිස ණය මුදලක් වශයෙන් නොවේ යැයි පැවසූහ.
කෙසේ නමුත් පසු අවස්ථාවක සේවාදායකයා ඔහුට අදාළ මුදල ගෙවූ බව දැනුම් දෙමින් ඒ සඳහා කුවිතාන්සිද උසාවියට ඉදිරිපත් කළ නීතිඥවරු මේ පිළිබඳ කරුණු පොලිසියට දැනුම් දුන්නත් ඔවුන් එම කරුණු හෝ සලකා අත්අඩංගුවට ගෙන අධිකරණයට ඉදිරිපත් කළ තම සේවාදායකයාට ඇප නියම කරන්නැයි ඉල්ලා සිටියහ.දෙපාර්ශ්වයේ කරුණු සලකා බැලීමෙන් අනතුරුව පොලිසියේ ක්‍රියාකලාපය දැඩි ලෙස දෝෂාරෝපණයට ලක්කළ මහේස්ත්‍රාත්වරයා සැකකරු ඇප මත මුදාහැරීමට නියම කළේය.
මනෝප්‍රිය ගුණසේකර
0 Comments