දුම්රිය සංචාරක බංගලාවක නවාතැන්ගෙන සිටියදී හදිසියේ ජීවිතක්ෂයට පත්වූ දුම්රිය සාමාන්‍යාධිකාර් හේරත් මුදියන්සේලාගේ කටුපොල්ලන්දේ ගෙදර වික්‍රමසිංහ බණ්ඩාර (අවු.58) මහතාගේ මරණයට අදාළ පශ්චාත් මරණ පරීක්ෂණයේදී පෙරේදා (23දා) විවෘත තීන්දුවක් නිකුත් කෙරිණ.එම පශ්චාත් මරණ පරීක්ෂණයේදී දුම්රිය සාමාන්‍යාධිකාරීවරයාගේ මුත්‍රා හා ලේ සාම්පල මෙන්ම අක්මාව, ආමාශය, ඇතුළු ශරීරයේ කොටස් කිහිපයක් රජයේ රස පරීක්ෂකවරයා වෙත යවා අදාළ පරීක්ෂණවලින් පසු එම මරණයට හේතුව නිශ්චිතවම දැන ගැනීමට හැකි බව අනුරාධපුර ශික්ෂණ රෝහලේ අධ්‍යක්ෂ වෛද්‍ය දුලාන් සමරවීර මහතා පැවසීය.ශරීරයේ අභ්‍යන්තර හෝ මතුපිට සැක කටයුතු තුවාල කිසිවක් දක්නට නොමැති බවද පශ්චාත් මරණ පරීක්ෂණයේදී අනාවරණය වූ බව හෙතෙම සඳහන් කළේය. ජීවිතක්ෂයට පත් වූ දුම්රිය සාමාන්‍යාධිකාර් බණ්ඩාර මහතාගේ දේහය පිළිබඳ පශ්චාත් මරණ පරීක්ෂණය අනුරාධපුර ශික්ෂණ රෝහලේ විශේෂඥ අධිකරණ වෛද්‍ය නිලධාර් එම්. ඒ.සී. ගුණතිලක මහතා විසින් සිදු කිරීමෙන් අනතුරුව දේහය, බිරිඳ ඇතුළු ඥාතීන් හට අවසන් කටයුතු සිදු කිරීම සඳහා භාර දෙන ලදි.
දුම්රිය සාමාන්‍යාධිකාරි එච්. එම්. කේ. ඩබ්ලිව්. බණ්ඩාර මහතා, විශේෂ රාජකාර් කටයුතු කිහිපයක් සඳහා ඉකුත් 22දා අනුරාධපුරයට පැමිණ දුම්රිය ඉංජිනේරුවරුන් තිදෙනෙකු සමග අනුරාධපුර ධර්මපාල මාවතේ පිහිටි දුම්රිය සංචාරක බංගලාව තුළ කාමරයක නවාතැන්ගෙන සිටියදී පෙරේදා(23දා) අලුයම මෙලෙස ජීවිතක්ෂයට පත්ව තිබුණි. දුම්රිය සංචාරක බංගලාව ඇති කාමර දෙකක ඉංජිනේරුවරුන් තිදෙනකු නවා තැන්ගෙන සිටි බවත්, දුම්රිය සාමාන්‍යාධිකාර්වරයා එක් කාමරයක නවාතැන් ගෙන සිටි බවත් දුම්රිය මාර්ග ප්‍රධාන ඉංජිනේරු ඊ.එම්.එස්.ටී.කේ. ප්‍රියන්ත දීගන මහතා ලබා දුන් ප්‍රකාශවල සටහන්ව ඇතැයි. මෙහිදී පොලීසිය සඳහන් කළේය.දුම්රිය සාමාන්‍යාධිකාරිවරයා ඇතුළු එම පිරිස රාත්‍රී නින්දට ගොස් ඇති අතර, පසුදා (23දා) උදෑසන 6.30ට පමණ සංචාරක බංගලා සේවකයෙකු තේ පානය සඳහා සාමාන්‍යාධිකාර්වරයා සිටි කාමරයේ දොරට තට්ටු කර ඇති බව පොලීසිය කියයි.
ඒ මහතාට නින්ද ගොස් ඇති බවට සැක සිතූ දුම්රිය ඉංජිනේරුවරුන් පිරිස යළිත් වරක් උදෑසන හතට පමණ කාමරයේ දොරට තට්ටු කර, ජංගම දුරකථනයට ඇමතුම් කිහිපයක් ගෙන ඒවාට ප්‍රතිචාරයක් නොදැක්වීම හේතුවෙන් කාමරයේ දොර කඩා විවෘත කර බැලීමේදී සාමාන්‍යාධිකාර්වරයා කාමරයේ ඇඳ අසල මුනින් අතට වැටී සිටි බවත්, මුහුණ ප්‍රදේශයෙන් ලේ වහනය වී තිබූ බවත් ප්‍රධාන ඉංජිනේරු ප්‍රියන්ත දීගන මහතා ලබා දුන් ප්‍රකාශවල සටහන්වේ.එම සංචාරක බංගලාව ආසන්නයේ ඇති දුම්රිය නිල නිවාසයක සිටි අයගේද උදව් ඇතිව පරීක්ෂා කර බලා, 1990 ගිලන් රථයක් මාර්ගයෙන්, දුම්රිය සාමාන්‍යාධිකාර්වරයා අනුරාධපුර ශික්ෂණ රෝහල වෙත රැගෙන ගිය බවත් එම ප්‍රකාශවල වැඩිදුරටත් සඳහන් වේ.
බී.ජී. චතුරංග
0 Comments