වසර 26කට පෙර කන්තලේ භාරතීපුරම් ගම්මානයේදී දෙමළ සිවිල් වැසියන් අට දෙනෙකු ඝාතනය කිරීමේ සිද්ධියට වරදකරුවන් වූ පොලිස් නිලධාරීන් පස් දෙනෙකුට අනුරාධපුර මහාධිකරණය සිකුරාදා මරණ දඬුවම නියම කළේය.
මහාධිකරණ විනිසුරු මනෝජ් තල්ගොඩපිටිය මහතා විසින් මෙම දඬුවම නියම කළේය.
මෙම පොලිස් නිලධාරීන් පස්දෙනා භාරතීපුරම් පොලිස් මුරපොළට අනුයුක්තව සේවය කළ අය වන අතර, මිනීමැරුමක් සිදුකිරීමේ අරමුණින් නීතිවිරෝධී ලෙස රැස්වීම් සම්බන්ධයෙන් චෝදනා එල්ල වී ඇත.
මෙලෙස දඬුවම් නියම වූයේ කොස්තාපල් චන්ද්‍රරත්න බණ්ඩාර, කොස්තාපල් නිමල් ප්‍රේමසිරි කෝනාර, පොලිස් පරීක්ෂක ආර්.එම් රණරාජ බණ්ඩාර, උප පොලිස් පරීක්ෂක වයි.එල් සෝමරත්න සහ කොස්තාපල් සෙනරත් බණ්ඩාර මැදවෙල යන අයටයි.
තම පොලිස් මුරපොළට පහර දීමෙන් පසු තමන් ගම සෝදිසි කළ බව චූදිත පොලිස් නිලධාරීන් ප්‍රකාශ කළද පොලිස් මුරපොළට ප්‍රහාරයක් එල්ල වී නොමැති බව පරීක්‍ෂණවලින් හෙළි විය.
1996 පෙබරවාරි 01 වැනිදා සිදු වූ සිද්ධියෙන් පසුව ත්‍රිකුණාමලය මහාධිකරණයේ පොලිස් නිලධාරීන් 13 දෙනෙකුට එරෙහිව මෙම නීති ක්‍රියාමාර්ගය මුලින්ම ගොනු කර ඇත.
කෙසේ වෙතත්, එල්.ටී.ටී.ඊ.ය සැකකරුවන් දෙදෙනෙකු අධිකරණයේ පෙනී සිටියදී ඝාතනය කිරීමෙන් පසු නඩුව අනුරාධපුර මහාධිකරණයට මාරු කරනු ලැබුණි.
සිද්ධියෙන් වසර 19කට පසු 2005 වසරේදී මෙම නඩුව පවරා ඇත.
පැමිණිල්ල මෙහෙයවීමෙන් අනතුරුව නියෝජ්‍ය සොලිසිටර් ජනරාල් මාධව තෙන්නකෝන් මහතා අධිකරණයෙන් ඉල්ලා සිටියේ සැකකරුවන් පස් දෙනෙකුට එරෙහි නඩුව පවත්වාගෙන යාමට ප්‍රමාණවත් සාක්ෂි නොමැති බැවින් ඔවුන්ව නිදොස් කොට නිදහස් කරන ලෙසයි.
පසුව තවත් සැකකරුවන් දෙදෙනෙකු නිදොස් කොට නිදහස් කෙරුන අතර. ඉතිරි සැකකරුවන්ට චෝදනා 37ක් එල්ල විය.
රජයේ රස පරීක්ෂක වාර්තාව ඉදිරිපත් කිරීම ප්‍රමාද වීම ඇතුළු හේතු ගණනාවක් නිසා නඩු තීන්දුව ප්‍රමාද විය. උසාවියට එය ලැබුණේ 2022 දී පමණය.
පැමිණිල්ල මෙහෙයවූයේ නියෝජ්‍ය සොලිසිටර් ජනරාල් මාධව තෙන්නකෝන් මහතා වන අතර විත්තිකරුවන් වෙනුවෙන් නීතිඥවරුන් වන ලාල් කුලරත්න සහ චාන්දනී හමංගල මහත්මිය පෙනී සිටියහ.
0 Comments