නාගොඩ මහ රෝහලේ කොරෝනා වාට්ටුවේ රෝගියකු ඊයේ (20) අලුයම වැසිකිළියේ ජනේලයෙන් පැනගොස් ඇති බව වාර්තා වී ඇතැයි නාගොඩ මහ රෝහලේ අධ්‍යක්ෂ වෛද්‍ය තමර කළුබෝවිල මහතා පැවැසීය.

ෙසේ රෝහලින් පැනගොස් ඇත්තේ 53 හැවිරිදි පුද්ගලයෙකි. උදෑසන 6.10ට පමණ වැසිකිළියට යන බව අසල ඇඳක සිටින පුද්ගලයකුට පවසා ඔහු පිටව ගොස් ඇති අතර හෙද නිලධාරිනිය කළ පරික්ෂාවේ දී ඔහු වාට්ටුවේ නොමැති බව දැන ගැනීමෙන් පසු ආරක්‍ෂක අංශයට දැනුම් දී සොයා බැලිමේ දී වාට්ටුවේ රෝගීන් පාවිච්චි කරන වැසිකිළියේ ජනේලයේ පියන විවෘතකර පැනගොස් ඇති බවට තහවුරු වී තිබේ.

කොරෝනා සැක සහිත රෝග ලක්‍ෂණ මතුවී පසුගිය 18 වැනිදා රෝහල්ගත කර ඇති ඔහු රැපිඩ් ඇන්ටිජන් පරීක්‍ෂණයක් සිදුකර පී.සී.ආර්. පරික්‍ෂණයකට ද යොමු කළ බවත් එහි වාර්තාව ලැබීමට නියමිතව ඇති බවත් රෝහල් අධ්‍යක්‍ෂකවරයා වැඩිදුරටත් පැවසීය.


- සුමිත් ප්‍රේමතිලක -