කොළඹ 10 ශාන්ත ජෝශප් විද්‍යාලයේ සිසුවෙකුගේ දෙමාපියෙකු කොරෝනා වෛරසය සඳහා ධනාත්මකවීම නිසා එම සිසුවා මාර්ගයෙන් පාසලට වෛරසය පැතිර ඇතිද යන්න ගැන සැකයක් මතුව ඇති අතර ඒ නිසා පාසලේ පිරිස් කලබලවී පණිවිඩ හුවමාරුකරගනිමින් සිටින බව වාර්තාවේ.

මෙම කලබලකාරී තත්වය මැද සන්සුන් වන ලෙස එම පාසල නිවේදනයක් නිකුත් කරමින් කියා සිටී.


පාසල පවසන පරිදි මේ වන විට එම තැනැත්තා රජයේ නම් කළ ස්ථානයක ප්‍රතිකාර ලබන අතර සිසුවා ඇතුළු පවුලේ අය නිරෝධායනය කර ඇත්තේ පූර්වාරක්ෂක පියවරක් වශයෙනි.

“අනෙක් පවුලේ සාමාජිකයන් කිසිවෙකු කිසිදු රෝග ලක්ෂණයක් නොපෙන්වන බවත් PCR පරීක්ෂණවලට භාජනය වීමට සූදානම්ව සිටින බවත් එම ප්‍රතිඵල අපි ඉක්මනින් දැනුවත් කරන බවත් දන්වා සිටින්නෙමු” යනුවෙන් එම ප්‍රකාශය සඳහන් කරයි.

අදාළ සියලු දෙමාපියන් සහ ගුරුවරුන් මෙම දැනුවත් කිරීම සිදුවන තුරු සන්සුන් වන්නැයි දන්වා ඇත.

ශාන්ත ජෝශප් විද්‍යාලය පැවසුවේ අවශ්‍ය සියලු ආරක්ෂක රෙගුලාසිවලට අනුකූලව කටයුතු සිදුවන බවත් ඔවුන්ගේ ආරක්ෂාව සහතික කිරීම සඳහා ජොසෆියානු ප්‍රජාව නිරන්තරයෙන් අධීක්ෂණය කරන බවත්ය.