විදුලිබල හා බලශක්ති අමාත්‍ය මහින්ද අමරවීර මහතාට උපදෙස් දී ඇත.
එම මාසවලදී විදුලි ඒකක 0 සිට 90 දක්වා භාවිත කළ පාරිභෝගිකයන්ගේ විදුලිබිලෙන් සියයට 25ක් අඩුකිරීමේ යෝජනාවක් අමාත්‍ය මණ්ඩලයට ඉදිරිපත් කළ අවස්ථාවේ ජනාධිපතිවරයා මෙම උපදෙස් දුන් බව කැබිනට් ප්‍රකාශක, තොරතුරු හා සන්නිවේදන තාක්‍ෂණ, උසස් අධ්‍යාපන, තාක්‍ෂණ හා නවෝත්පාදන අමාත්‍ය ආචාර්ය බන්දුල ගුණවර්ධන මහතා ඊයේ (9) පැවසීය.
මෙම සහන ලබාදීම විදුලි ඒකක 120ක් පමණ දක්වා වැඩි කළ හැකිදැයි සලකා බැලීමට හා තවත් සහන දීමට හැකිදැයි යන්න මහා භාණ්ඩාගාරය නිලධාරීන් සමඟද සාකච්ඡා කර එම සහන ද සමඟ යෝජනාව ලබන කැබිනට් මණ්ඩලයට යළි ඉදිරිපත් කරන්නැයි ජනාධිපතිවරයා ඇමැති අමරවීර මහතාට උපදෙස් දුන් බව ද ගුණවර්ධන මහතා කීවේය. ඇමැති බන්දුල ගුණවර්ධන මහතා මේ බව පැවසුවේ රජයේ ප්‍රවෘත්ති දෙපාර්තමේන්තුවේදී ඊයේ (9) පැවති කැබිනට් තීරණ දැනුම්දීමේ මාධ්‍ය හමුව අමතමිනි.
ලංකා විදුලිබල මණ්ඩලය පාඩු ලබන ආයතනයක් වුවත් විදුලි බිල්පත් ඉහළ ගොස් ඇත්තේ කොවිඩ් 19 වසංගත තත්ත්වය හේතුවෙන් ජනතාව වැඩි කලක් නිවෙස්වල සිටි නිසා බැවින් සුව සහනයක් ලෙස සලකා ඔවුන්ට මෙම සහනදීමට තීරණය කර ඇතැයි ද ඇමැතිවරයා සඳහන් කළේය.
එහිදී දැනට යෝජිත සහන අඩුනොවන අතර එම සහන තවත් වැඩිවනු ඇතැයි ද ඇමැති බන්දුල ගුණවර්ධන මහතා ප්‍රකාශ කළේය.
(ඩයනා උදයංගනී)
