පසුගිය රජය ක්‍රියාත්මක කළ මාධ්‍යවේදීන්ට හා කලාකරුවන්ට වාහනයක් මිලදී ගැනීම සඳහා පොලී රහිත රුපියල් ලක්‍ෂ 12ක ණය මුදලක් ලබාදීම සඳහා වන යෝජනාවක් 2019 අය-වැය යෝජනාවලට ඇතුළත් කිරීම සඳහා මුදල් හා ජනමාධ්‍ය අමාත්‍ය මංගල සමරවීර මහතාට භාරදෙන බව ඉදිකිරීම් හා සංස්කෘතික අමාත්‍ය සජිත් ප්‍රේමදාස මහතා ප්‍රකාශ කරයි.

එමෙන්ම කලාකරුවන්ට හා මාධ්‍යවේදීන්ට නිවාස ඉදිකිරීම සඳහා හෝමාගම, යහලකැලේ වත්තෙන් ඉඩම් පවරා ගැනීම පිළිබඳව ඉඩම් හා පාර්ලිමේන්තු කටයුතු අමාත්‍ය ගයන්ත කරුණාතිලක මහතා සමඟ සාකච්ඡා කිරීමටත් ඊට අදාළව සැබැවින්ම නිවාස අහිමි මාධ්‍යවේදීන් හා කලාකරුවන් තෝරා ගැනීම සඳහා
කමිටුවක් පත්කිරීමටත් අමාත්‍යවරයා තීරණය කර ඇත.

මාංශ පේශීවල ක්‍රියාකාරීත්වය දුර්වලවීමේ 'මයෝපති' නම් දුර්ලභ රෝගී තත්ත්වයකින් වසර 5කට ආසන්න කාලයක් ඇවිදීමේ අපහසුතාවකින් යුතුව රෝද පුටුවක් භාවිත කරන රංගන ශිල්පිනියක් ලෙස ජනාදරයට පත්වූ අනූෂා සොනාලි ද සිල්වා මහත්මියට මොරටුව සයුරුපුර මහල් නිවාස සංකීර්ණයෙන් රුපියල් ලක්‍ෂ 30ක් පමණ වටිනා නිවෙසක් ප්‍රදානය කිරීම නිමිත්තෙන් බත්තරමුල්ල, සෙත්සිරිපාය එම අමාත්‍යාංශ ශ්‍රවණාගාරයේදී ඊයේ (03දා) දහවල් පැවැති මාධ්‍ය හමුවේදී අමාත්‍යවරයා මෙම අදහස් පළ කළේය.

විසිදැල, හඬන කිංකිණි, භව සසර, ගිනිගත් හෝරාව, දරු උපත, සුන්දර වරද සහ මමත් ගැහැනියක් යන චිත්‍රපටවලට රංගනයෙන් දායක වූ ඇය 1995 වසරේදී 'වසරේ නැඟී එන නිළිය' ලෙස සරසවි සම්මානයෙන් පිදුම් ලැබුවද, ඇගේ රෝගී තත්ත්වය හේතුවෙන් නිසි ආදායම් මාර්ගයක් හෝ පදිංචියට නිවෙසක් හෝ නොමැතිව අසරණ තත්ත්වයට පත්ව සිටියදී රන්ජන් රාමනායක නියෝජ්‍ය ඇමැතිවරයා විසින් අමාත්‍ය සජිත් ප්‍රේමදාස මහතා දැනුවත් කිරීමෙන් අනතුරුව මෙම නිවෙස ලබාදීමට පියවර ගෙන තිබේ.

අනූෂා සෙනාලි මහත්මිය සුවපත් කිරීමට හැකි සෑම සහායක්ම ලබාදීමටත්, ඇයගේ යැපීම සඳහා කිසියම් ස්වයං රැකියාවක් සලසාදීමටත් පියවර ගන්නා බවට ප්‍රතිඥා දුන් අමාත්‍ය සජිත් ප්‍රේමදාස මහතා ඇගේ පුතුට එම අමාත්‍යාංශය යටතේ රැකියාවක් ලබාදීමටද එකඟත්වය පළ කළේය.


-උපතිස්ස පෙරේරා-