ජනාධිපති මෛත්‍රිපාල සිරිසේන මහතා පාර්ලිමේන්තුව විසුරුවා හැරීම නීති විරෝධී බවත් එකී ක්‍රියාමාර්ගයට. එරෙහිව ශ්‍රේෂ්ඨාධිකරණය හමුවට යන බවත් දෙමළ ජාතික සන්ධාන පාර්ලිමේන්තු මන්ත්‍රී එම්.ඒ.සුමන්තිරන් මහතා පැවසීය.
ජනාධිපතිවරයා සිකුරාදා(9) මධ්‍යම රාත්‍රියේ සිට ක්‍රියාත්මක වන පරිදි පාර්ලිමේන්තුව විසුරුවා හැරීම පිළිබඳ මාධ්‍ය වෙත අදහස් පලකරමින් සුමන්තිරන් මහතා මේ බව අවධාරණය කළේය.
එහිදී වැඩිදුරටත් අදහස් දැක්වූ සුමන්තිරන් මහතා මෙසේද කීය.
පාර්ලිමේන්තුවේ ධූර කාලය වසර හතර හමාරක් ගත වීමට පෙර ජනාධිපතිවරයාට එය විසුරුවා හැරිය නොහැකියි.
පාර්ලිමේන්තුවේ බහුතරය නොමැතිව සිටින පාර්ශවයට මේ කාලය එක් අවස්ථාවක් උදව්වක් වේවි.මෙලෙස පාර්ලිමේන්තුව විසුරුවා හැරීම අධිකරණය අනුමත නොකරන බව දැන දැනම එය විසුරුවා හැරීම තුළින් තව ටික කාලයක් හරි ඔවුනට තියෙයි කියන හැගීම මත මෙලෙස කටයුතු කර තිබෙනවා.
සති අන්තයේ මෙලෙස පාර්ලිමේන්තුව විසුරුවා හැරීමෙන් අපට අධිකරණය හමුවට යාමට තවත් දින දෙකක් ගත වන බව දැනගෙන එය අවස්ථාවක් කර ගනිමින් මෙම ක්‍රියාමාර්ගය ගෙන තිබෙනවා.මෙම නියෝගයට අභියෝග කිරීමට අපි සූදානම් යැයිද මන්ත්‍රීවරයා පැවසීය.
