ප්රකට ඇමරිකානු ගායිකා බ්රිට්නි ස්පියර්ස් මත්පැන් සහ මත්ද්රව්ය භාවිත කර රිය පැදවීමේ (DUI) චෝදනාව මත මාර්තු 04 වන බදාදා රාත්රියේදී කැලිෆෝනියාවේ වෙන්චුරා ප්රාන්තයේදී අත්අඩංගුවට පත්ව තිබේ. ප්රධාන ජාත්යන්තර මාධ්ය වාර්තා රැසකට අනුව, එදින රාත්රී 9:30 ට පමණ ඇය සිය නිවස ආසන්නයේ වෙස්ට්ලේක් විලේජ් ප්රදේශයේ පිහිටි 101 අධිවේගී මාර්ගයේ දකුණු දෙසට ඉතා අධික වේගයෙන් සහ අක්රමවත් ලෙස කළු පැහැති BMW 430i වර්ගයේ මෝටර් රථයක් පදවාගෙන යමින් සිටියදී කැලිෆෝනියා අධිවේගී මාර්ග සංචාරක පොලිසිය විසින් මෙලෙස නවතා ඇත.
එම අවස්ථාවේදී රථය තුළ ඇය හුදකලාව ගමන් කර ඇති අතර, ඇය යම් මත්ද්රව්යයක හෝ මත්පැන්වල බලපෑමට ලක්ව ඇති බව නිරීක්ෂණය කළ පොලිස් නිලධාරීන් විසින් අදාළ ක්ෂේත්ර පරීක්ෂාවන් සිදු කිරීමෙන් අනතුරුව ඇයව අත්අඩංගුවට ගෙන ඇත. වාර්තා වන පරිදි, අත්අඩංගුවට පත්වීමෙන් පසු ඇයව කෙටි කාලයකට රෝහලක් වෙත රැගෙන ගොස් ඇති අතර, පසුව බ්රහස්පතින්දා අලුයම 3:00 ට පමණ බන්ධනාගාරගත කර තිබේ. අනතුරුව එදිනම උදෑසන 6:00 ට පමණ ඇයව නිදහස් කර ඇති අතර, ඇයගේ මෝටර් රථය පොලිස් භාරයට ගෙන ඇත.
මෙම සිදුවීමට අදාළ නඩු විභාගය 2026 මැයි මස 04 වන දින පැවැත්වීමට නියමිත බව වැඩිදුරටත් වාර්තා වේ.
මෙම සිදුවීම සම්බන්ධයෙන් අදහස් දක්වමින් බ්රිට්නි ස්පියර්ස්ගේ නියෝජිතයෙකු ප්රකාශ කර ඇත්තේ, මෙය කිසිසේත්ම සමාව දිය නොහැකි අවාසනාවන්ත සිදුවීමක් බවයි. එසේම, ඇය නීතියට අනුකූලව කටයුතු කරමින් අවශ්ය උපකාර සහ සහාය ලබාගැනීමට කටයුතු කරනු ඇති බවත්, මෙය ඇයගේ ජීවිතයේ බොහෝ කලක සිට සිදුවිය යුතුව තිබූ වෙනසක මූලික පියවර වනු ඇතැයි බලාපොරොත්තු වන බවත් එම නිවේදනයේ වැඩිදුරටත් සඳහන් වේ. මේ වන විට ඇය සිය ඉන්ස්ටග්රෑම් ගිණුමද අක්රිය කර ඇති අතර, 2007 වසරේදී රිය අනතුරක් සිදුකර පලායාමේ චෝදනාවකින් නිදහස් වීමෙන් පසුව ඇය මෙවැනි චෝදනාවක් මත අත්අඩංගුවට පත් වූ පළමු අවස්ථාව මෙය ලෙස සැලකේ. කෙසේ වෙතත්, මේ සම්බන්ධයෙන් සිදුකරන පරීක්ෂණ තවදුරටත් ක්රියාත්මක බැවින්, ඇය භාවිත කළ නිශ්චිත මත්ද්රව්ය වර්ග හෝ රුධිර පරීක්ෂණ වාර්තා පිළිබඳව මෙතෙක් කිසිදු නිල තොරතුරක් ප්රකාශයට පත්වී නොමැත.