ඇමෙරිකා එක්සත් ජනපදය සහ ඊශ්රායලය විසින් ඒකාබද්ධව එල්ල කරන ලද ප්රහාරයකින් ඉරානයේ උත්තරීතර නායක අයතුල්ලා අලි කමේනි ඝාතනය වීමට එරෙහිව පාකිස්තානය පුරා දැවැන්ත විරෝධතා හටගෙන තිබේ. ඉරිදා අලුයම පාකිස්තානයේ කරච්චි නුවර පිහිටි ඇමෙරිකානු කොන්සල් කාර්යාලය අසල පැවති ඉරාන හිතවාදී විරෝධතාවක් අතරතුර අවම වශයෙන් පුද්ගලයින් නව දෙනෙකුවත් ජීවිතක්ෂයට පත්ව ඇත.
කරච්චි නුවර මයි කොලාචි මාර්ගයේ පිහිටි ඇමෙරිකානු කොන්සල් කාර්යාලයට බලහත්කාරයෙන් කඩා වැදීමට සිය ගණනක් වූ විරෝධතාකරුවන් උත්සාහ කර ඇති අතර, ඔවුන් විසුරුවා හැරීම සඳහා ආරක්ෂක අංශ විසින් වෙඩි තැබීම හේතුවෙන් තවත් විශාල පිරිසකට තුවාල සිදුව තිබේ. කරච්චි සිවිල් රෝහල වෙත මළ සිරුරු නවයක් ගෙන ආ බව පොලිස් ශල්ය වෛද්ය සුම්මයා සයිඩ් අල් ජසීරා පුවත් සේවයට තහවුරු කළාය. මීට අමතරව, තුවාල ලැබූවන්ව වෙනත් පුද්ගලයින් විසින් රෝහල් කරා ගෙන යන අයුරු සහ විරෝධතාකරුවන් කොන්සල් කාර්යාල ගොඩනැගිල්ලට කඩා වැදීමට උත්සාහ කරන අයුරු දැක්වෙන තහවුරු කරන ලද වීඩියෝ දර්ශන ද අන්තර්ජාලය පුරා සංසරණය වේ.
මෙම නොසන්සුන්තාවය කරච්චි නුවරට පමණක් සීමා වී නොමැති අතර පාකිස්තානයේ තවත් ප්රදේශ කිහිපයකම දැවැන්ත විරෝධතා ව්යාප්ත වී ඇත. සංචාරකයින් අතර ප්රසිද්ධියක් උසුලන උතුරු පාකිස්තානයේ ෂියා බහුතරයක් වෙසෙන ගිල්ගිට් බල්ටිස්තාන් කලාපයේ ස්කාර්දු නගරයේ පිහිටි එක්සත් ජාතීන්ගේ කාර්යාල ගොඩනැගිල්ලකට ද විරෝධතාකරුවන් විසින් ගිනි තබා තිබේ. විශාල පිරිසක් එක්රැස් වී මෙම ගොඩනැගිල්ල මුළුමනින්ම ගිනිබත් කළ බවත්, එහෙත් ඉන් කිසිදු ජීවිත හානියක් වාර්තා වී නොමැති බවත් පළාත් පාලන ප්රකාශක ෂබීර් මීර් රොයිටර් පුවත් සේවයට ප්රකාශ කර ඇත.
මේ අතර, මධ්යම ලාහෝර් නුවර පිහිටි ඇමෙරිකානු කොන්සල් කාර්යාලය ඉදිරිපිට ද සිය ගණනක් වූ විරෝධතාකරුවන් පිරිසක් එක්රැස් වී තිබේ. කොන්සල් කාර්යාලයට යාර සිය ගණනක් දුරින් පිහිටි ආරක්ෂක ගේට්ටුවකට හානි කිරීමට ඇතැම් විරෝධතාකරුවන් උත්සාහ කළ ද, කිසිදු බලප්රයෝගයකින් තොරව ඔවුන්ව සාමකාමීව නැවැත්වීමට පොලිසිය සමත් වූ බව ඇසින් දුටු සාක්ෂිකරුවෙකු වන අකීල් රාසා පවසයි. ඒ හේතුවෙන් ලාහෝර් නුවරින් කිසිදු ප්රචණ්ඩකාරී සිදුවීමක් මේ දක්වා වාර්තා වී නොමැත.
