කේන් විළියම්සන් විස්සයි20 පිටියෙන් සමුගනී

 ඉදිරි විස්සයි විස්ස ලෝක කුසලාන තරගාවලියට මාස හතරක් වැනි කෙටි කාලයක් තිබියදී, නවසීලන්තයේ ප්‍රවීණ ක්‍රීඩක කේන් විලියම්සන් ජාත්‍යන්තර විස්සයි විස්ස ක්‍රිකට් පිටියෙන් සමුගැනීමට තීරණය කර තිබේ. 35 හැවිරිදි විලියම්සන්, තරග 93කින් සමන්විත සිය විස්සයි විස්ස ජාත්‍යන්තර ක්‍රිකට් දිවියට මෙලෙස තිත තබයි.

2011 වසරේදී ජාත්‍යන්තර විස්සයි විස්ස වරම් දිනාගත් ඔහු, නවසීලන්තය වෙනුවෙන් එම පිටියේ දෙවැනියට වැඩිම ලකුණු ලාභියා ලෙස සිය ක්‍රිකට් දිවිය අවසන් කරයි. ඔහු රැස් කර ඇති මුළු ලකුණු සංඛ්‍යාව 2575ක් වන අතර, එයට අර්ධ ශතක 18ක් ඇතුළත් වේ. ඔහුගේ පිතිකරණ සාමාන්‍යය 33ක් ලෙස සටහන් වන අතර, ඉහළම ලකුණු සංඛ්‍යාව 95කි. ක්‍රීඩා කළ තරග 93න් 75කදීම ඔහු කණ්ඩායමේ නායකත්වය දැරූ අතර, 2016 සහ 2022 ලෝක කුසලාන තරගාවලිවලදී අවසන් පූර්ව වටයටත්, 2021 ලෝක කුසලාන තරගාවලියේදී අවසන් මහා තරගයටත් නවසීලන්ත කණ්ඩායම මෙහෙයවීමට ඔහු සමත් විය.

තම තීරණය පිළිබඳව අදහස් දක්වමින් විලියම්සන් පවසා ඇත්තේ, තමා දීර්ඝ කාලයක් මෙම ක්‍රීඩා රටාවේ කොටස්කරුවෙකු වීමට ලැබීම ගැන සතුටු වන බවත්, අත්දැකීම් සහ මතකයන් පිළිබඳව කෘතඥ වන බවත්ය. ඉදිරි තරගමාලා සහ ලෝක කුසලානය ඉලක්ක කර ගනිමින් කණ්ඩායමට පැහැදිලි බවක් ලබා දීමටත්, තමාටත් මෙය සුදුසුම අවස්ථාව බව ඔහු සඳහන් කර ඇත. නවසීලන්තය සතුව දක්ෂ විස්සයි විස්ස ක්‍රීඩකයන් රැසක් සිටින බවත්, ලෝක කුසලානයට පෙර ඔවුන්ව සූදානම් කිරීම වැදගත් බවත් ඔහු පෙන්වා දෙයි.

මිචෙල් සෑන්ට්නර් විශිෂ්ට නායකයෙකු බව පැවසූ විලියම්සන්, 'බ්ලැක්කැප්ස්' කණ්ඩායම මෙම ආකෘතිය ඔස්සේ ඉදිරියට ගෙන යාමට දැන් ඔවුන්ට අවස්ථාව උදා වී ඇති බවත්, තමා ඈත සිට සහාය දෙන බවත් කියා සිටියේය.

2024 විස්සයි විස්ස ලෝක කුසලාන තරගාවලියෙන් නවසීලන්තය ඉක්මනින් ඉවත් වීමෙන් පසුව, විලියම්සන් ඒ වන විටත් සීමිත පන්දුවාර නායකත්වය මිචෙල් සෑන්ට්නර් වෙත පවරා තිබුණි. එතැන් සිට ඔහු සිය ජාත්‍යන්තර තරග, ෆ්‍රැන්චයිස් ක්‍රිකට් සහ පවුලේ වගකීම් සමබර කර ගනිමින්, ජාතික කණ්ඩායමට පෙනී සිටියේ තෝරාගත් අවස්ථාවලදී පමණි.

ඕස්ට්‍රේලියාවට එරෙහිව පැවති චැපල්-හැඩ්ලි විස්සයි විස්ස තරගාවලියෙන් ඉවත් වූ ඔහු, පසුව ඉකිලි ආබාධයක් හේතුවෙන් එංගලන්තයට එරෙහි තරග ද මග හැර ගත්තේය. චැම්පියන්ස් කුසලාන අවසන් මහා තරගයෙන් පසුව ඔහු නැවතත් සීමිත පන්දුවාර ක්‍රිකට් ක්‍රීඩාවට පිවිසුණේ මෑතකදී අවසන් වූ එංගලන්තයට එරෙහි එක්දින තරගාවලියේදීය. සිය විශිෂ්ට ක්‍රිකට් දිවියේ අවසන් භාගයට පැමිණ සිටින විලියම්සන්, අනෙකුත් ක්‍රිකට් ආකෘතිවල (ටෙස්ට් සහ එක්දින) තම අනාගතය පිළිබඳව විවෘත මනසකින් තීරණ ගන්නා බවටද පවසා ඇත.

විලියම්සන් මීළඟට 'නදර්න් ඩිස්ට්‍රික්ට්ස්' කණ්ඩායම නියෝජනය කරමින් නොවැම්බර් 26 වැනිදා ඕක්ලන්ඩ් කණ්ඩායමට එරෙහිව 'ප්ලන්කට් ෂීල්ඩ්' තරගයකට ක්‍රීඩා කිරීමට නියමිතය.

කෙසේ වෙතත්, ඔහුගේ ක්ෂණික අවධානය යොමු වී ඇත්තේ දෙසැම්බර් 2 වැනිදා ක්‍රයිස්ට්චර්ච්හිදී ආරම්භ වන බටහිර ඉන්දීය කොදෙව් කණ්ඩායමට එරෙහි ටෙස්ට් තරග තුනකින් සමන්විත තරගාවලිය වෙතය.

'බ්ලැක්කැප්ස්' කණ්ඩායම යනු සුවිශේෂී ස්ථානයක් බවත්, තමාට මෙම කණ්ඩායම කෙරෙහි ගැඹුරු කැපවීමක් ඇති බවත් ඔහු වැඩිදුරටත් සඳහන් කළේය. ජාත්‍යන්තර ක්‍රීඩාවට සහ මෙම පරිසරයට තමා ආදරය කරන බවත්, තමාට විශාල සහයෝගයක් ලබා දුන් පුහුණුකරු රොබ් ස්ටෙඩ් සහ නවසීලන්ත ක්‍රිකට් ආයතනය (NZC) සමඟ නිරන්තර සන්නිවේදනයක් පවත්වාගෙන යන බවත් ඔහු පැවසීය.

නවසීලන්ත ක්‍රිකට් ආයතනයේ ප්‍රධාන විධායක නිලධාරී ස්කොට් වීනින්ක් මහතා විලියම්සන්ගේ දායකත්වය අගය කරමින් කියා සිටියේ ඔහුගේ බලපෑම "අතිමහත්" බවය. ක්‍රීඩකයෙකු ලෙස ඔහුගේ දස්කම් මෙන්ම විස්සයි විස්ස කණ්ඩායමේ නායකයා ලෙස ඔහුගේ සේවයද අති විශාල බව වීනින්ක් මහතා සඳහන් කළේය. සියලු තත්ත්වයන් යටතේ ඔහු රැස් කළ ලකුණු, ඔහු ලෝක මට්ටමේ පිතිකරුවෙකු බව පිළිබිඹු කරන අතර, පිටියේ මෙන්ම ඉන් පිටත ඔහුගේ නායකත්වයේ බලපෑමද ඊට සමාන බව ඔහු පෙන්වා දුන්නේය. විලියම්සන්ගේ නායකත්වය යටතේ විස්සයි විස්ස කණ්ඩායම විශාල ස්ථාවරත්වයක් සහ සාර්ථකත්වයක් අත්විඳි බවත්, ඔහු කණ්ඩායම ඉතා හොඳ තත්ත්වයක තබා ඉවත් වන බවත් ප්‍රධාන විධායක නිලධාරියා පැවසීය.

විස්සයි විස්ස ලෝක කුසලාන අවසන් මහා තරගයේදී (පරාජය වුවද) ඔහු රැස් කළ ලකුණු 85, නවසීලන්ත ක්‍රීඩකයෙකු විසින් ක්‍රීඩා කළ වඩාත්ම විශේෂිත විස්සයි විස්ස ඉනිමක් බවද වීනින්ක් මහතා සිහිපත් කළේය. තවද, විලියම්සන් සිය එක්දින සහ ටෙස්ට් ක්‍රිකට් දිවිය අවසන් කරන ආකාරය තීරණය කිරීමට ඔහුට අයිතියක් ඇති බවද ඔහු අවධාරණය කළේය. "ඔහුගේ කීර්තිමත් වෘත්තීය දිවියේ අවසන් අදියරට පැමිණෙද්දී අපගේ පූර්ණ සහයෝගය ඔහුට ඇති බව අපි පැහැදිලි කර ඇත්තෙමු. ඔහු හැකි තාක් කල් ක්‍රීඩා කරනු දැකීමට අපි කැමතියි, නමුත් ඔහු අවසානයේ සමුගැනීමට තීරණය කළ විට, ඔහු නවසීලන්ත ක්‍රිකට් පුරාවෘත්තයක් ලෙස ඉතිහාසගත වනු ඇත," යනුවෙන් වීනින්ක් මහතා වැඩිදුරටත් පැවසීය.

ඉදිරියටත් විස්සයි විස්ස ෆ්‍රැන්චයිස් ක්‍රිකට් ක්‍රීඩාවේ නිරත වීමට නියමිත කේන් විලියම්සන්, මේ වන විටත් සියලුම ක්‍රිකට් ආකෘති හරහා නවසීලන්තය වෙනුවෙන් වැඩිම ලකුණු ලාභියා ලෙස වාර්තා අතර රැඳී සිටියි.