සිඩ්නි නුවර වෙඩි ප්‍රහාර - හැටේ අංකල් අත්අඩංගුවට

ඔක්තෝබර් මස 5 වන ඉරිදා රාත්‍රියේදී, ඕස්ට්‍රෙලියාවේ සිඩ්නි නුවර ක්‍රොයිඩන් පාර්ක් නම් උපනගරයේදී 60 හැවිරිදි පුද්ගලයෙකු විසින් සිදුකළ විවෘත වෙඩි තැබීමකින් ප්‍රදේශයම භීතියට පත් විය. පැය දෙකකට ආසන්න කාලයක් පුරා, මෙම පුද්ගලයා සිය පදිංචි ස්ථානයේ ජනේලයක සිට මෝටර් රථ, පොලිස් නිලධාරීන් සහ මගීන් ඉලක්ක කර ගනිමින් වට 50ත් 100ත් අතර ප්‍රමාණයක්වෙඩි තබා තිබේ.

වාසනාවකට මෙම සිදුවීමෙන් කිසිවෙකු මියගොස් නැත.

මෙම අතිශය භයානක සිදුවීමෙන් 50 හැවිරිදි පුද්ගලයෙකුගේ ගෙලට සහ පපුවට වෙඩි වැදීමෙන් බරපතල තුවාල ලබා, හදිසි ශල්‍යකර්මයකට භාජනය කෙරුණු නමුත්, ඔහුගේ තත්ත්වය බරපතල නොවන බව වාර්තා වේ. ඔහු සිය පවුලේ අය සමඟ මෝටර් රථයක පිටුපස අසුනේ ගමන් කරමින් සිටියදී මෙම වෙඩි ප්‍රහාරයට ලක්ව ඇත. මීට අමතරව, කැඩී ගිය වීදුරු කටු සහ උණ්ඩ කොටස් වැදීමෙන් තවත් පුද්ගලයින් 16 දෙනෙකු සුළු තුවාල ලබා තිබේ.



සිද්ධිය වාර්තා වූ වහාම ක්‍රියාත්මක වූ නිව් සවුත් වේල්ස් පොලිසියේ උපක්‍රමශීලී ඒකක, වෙඩි ප්‍රහාර මධ්‍යයේ  ආරක්ෂාව තහවුරු කර සැකකරු අත්අඩංගුවට ගැනීමට සමත් විය. සැකකරු අත්අඩංගුවට ගැනීමේදී තුවාල ලබා ඇති අතර, ඔහු මේ වන විට රෝහලේ පොලිස් ආරක්ෂාව යටතේ පසුවේ. පොලිසිය පවසන පරිදි, සැකකරුට ත්‍රස්තවාදී හෝ සංවිධානාත්මක අපරාධ කල්ලි සමඟ කිසිදු සම්බන්ධයක් නොමැති අතර, මෙම වෙඩි තැබීමට හේතුව මෙතෙක් අනාවරණය වී නොමැත.

වෙඩික්කරුට කිසිදු මානසික සෞඛ්‍ය ගැටලුවක් පිළිබඳව පොලිස් වාර්තා නොමැති බව වැඩබලන අධිකාරී ස්ටීවන් පැරී සඳහන් කළේය. සැකකරු මීට පෙර පොලිසිය සමඟ සම්බන්ධ වී ඇත්තේ ඉතා අවම අවස්ථා ගණනකදී පමණක් බවත්, ඔහු මත්ද්‍රව්‍ය හෝ මත්පැන් පානය කර නොසිටි බවත් පරීක්ෂණවලදී හෙළි වී තිබේ. සිද්ධිය වූ ස්ථානයෙන් පොලිසිය විසින් 30-කැලිබර් රයිෆලයක් සොයාගෙන ඇති අතර, බලපත්‍රයක් නොමැති සැකකරුට මෙම ගිනි අවිය ලැබුණු ආකාරය පිළිබඳව විමර්ශන ක්‍රියාත්මකයි.

මෙම වෙඩි තැබීම සිදු වූ ජෝර්ජස් රිවර් පාර, ආපනශාලා, පාසලක් සහ දේවස්ථානයක් ආසන්නයේ පිහිටි ජනාකීර්ණ ප්‍රදේශයකි. සිද්ධිය ඇසින් දුටුවන් පවසා සිටියේ එය චිත්‍රපටයක දර්ශනයක් මෙන් වූ බවයි. එක් කුලී රථ රියදුරෙකු ප්‍රකාශ කළේ, තමා මුලින් සිතුවේ යමෙකු රතිඤ්ඤා පත්තු කරනවා කියා බවත්, පසුව සිය මෝටර් රථයේ ජනේලවලට සහ වහලයට වෙඩි උණ්ඩ වැදී ඇති බව දුටු විට තමා කම්පනයට පත් වූ බවත්ය. සඳුදා උදෑසන වන විටත්, ප්‍රදේශයේ මෝටර් රථ සහ බස් නැවතුම්පොළවල වීදුරු කැබලි විසිරී තිබෙනු දක්නට ලැබුණු අතර, අධිකරණ වෛද්‍ය නිලධාරීන් විසින් සාක්ෂි එක්රැස් කිරීමේ කටයුතුවල නිරත විය.