ඇමරිකාවේ වෙසෙන ඉන්දියානු ජාතිකයෙකු වන කපිල් රඝු, තමන් භාවිතා කළ සුවඳ විලවුන් බෝතලයක් හේතුවෙන් විශාල ගැටලුවකට මුහුණ පා සිටී. රථවාහන නැවතුමකදී සිදුකළ පරීක්ෂාවකදී ඔහුගේ බෑගයේ තිබී ‘අබිං’ ලෙස ලේබල් කරන ලද සුවඳ විලවුන් බෝතලයක් සොයාගැනීමත් සමඟ බලධාරීන් එය මත්ද්රව්යයක් ලෙස වරදවා වටහාගෙන තිබේ. මේ හේතුවෙන් ඔහුව අත්අඩංගුවට ගෙන, ඔහුගේ වීසා බලපත්රය අවලංගු කර, පිටුවහල් කිරීමේ තර්ජනයට ලක්කර ඇත.
ඇමරිකානු පුරවැසියෙකු සමඟ විවාහ වී ස්ථිර පදිංචිය සඳහා ඉල්ලුම් කරමින් සිටි කපිල්, මැයි මස 3 වන දින සුළු රථවාහන වරදක් හේතුවෙන් පොලිස් පරීක්ෂාවකට ලක්විය. එහිදී ඔහුගේ මෝටර් රථයේ තිබී මෙම කුඩා සුවඳ විලවුන් බෝතලය හමුවී ඇති අතර, එහි අඩංගු වූයේ නීති විරෝධී ද්රව්යයක් බවට බලධාරීන් සැක කර ඇත.
එය හුදෙක් සුවඳ විලවුන් බෝතලයක් බව ඔහු දිගින් දිගටම පැහැදිලි කිරීමට උත්සාහ කළද,
බලධාරීන් විසින් ඔහුව අත්අඩංගුවට ගෙන ඇත. ඇමරිකාවේ ආහාර බෙදාහැරීමේ රියදුරෙකු ලෙස සේවය කළ කපිල්, මෙම සිදුවීම නිසා තමන් දැඩි දුෂ්කරතාවකට පත්ව ඇති බවත්, විමර්ශන සඳහා තමන් පූර්ණ සහයෝගය ලබා දෙන බවත් දේශීය පුවත්පතකට පවසා තිබුණි.
පසුව රසායනාගාර පරීක්ෂණයේදී එම බෝතලයේ තිබී ඇත්තේ මත්ද්රව්යයක් නොව සුවඳ විලවුන් බවට තහවුරු විය. කෙසේ වෙතත්, ප්රශ්න කිරීම් අතරතුර ඔහු පැවසූ ඇතැම් කරුණු හේතුවෙන් වීසා නීති උල්ලංඝනය කිරීමේ චෝදනා ඔහු වෙත එල්ල වී ඇත. ඔහුගේ නීතිඥයා පවසන්නේ, එම චෝදනාවලට පදනම් වී ඇත්තේ ඔහුගේ පෙර නීතිඥයා අතින් සිදුවූ පරිපාලනමය දෝෂයක් බවයි.
මෙම සිදුවීමෙන් අනතුරුව, කපිල් ආගමන හා රේගු බලාත්මක කිරීමේ අංශය වෙත යොමු කෙරුණු අතර, දින 30ක කාලයක් රඳවා තබා ගන්නා ලදී. මත්ද්රව්ය චෝදනා ඉවත් වුවද, ඔහු තවමත් පිටුවහල් කිරීමේ අවදානමෙන් මිදී නොමැත.
මේ වන විට නිදහස් කර සිටියද, පිටුවහල් කිරීමේ ක්රියාවලිය ක්රියාත්මක වන බැවින් ඔහුට රැකියාවක් කිරීමට හෝ තම පවුලට ආධාර කිරීමට නොහැකි තත්ත්වයක් උද්ගතව ඇත. තම බිරිඳ මේ වන විට සියලු වගකීම් දරමින් සිටින බව කපිල් පවසයි. පසුගිය අප්රේල් මාසයේදී විවාහ වූ මෙම යුවළ, නිවසක් මිලදී ගැනීම සඳහා ඔවුන් සතු සියලු ඉතුරුම් වැය කර ඇති අතර, මේ වන විට නීතිඥ ගාස්තු ගෙවා ගැනීමට පවා දැඩි අරගලයක නිරතව සිටිති.
Comments
Post a Comment
Your comment will be visible after approval