තරහාවී සිටි ට්‍රම්ප් දින 115 කට පසු එලොන් මස්ක් හමුවෙයි

 ඇමරිකානු ජනාධිපති ඩොනල්ඩ් ට්‍රම්ප් සහ බිලියනපති ව්‍යවසායක ඉලොන් මස්ක්, දින 115ක නිහැඬියාවකින් පසු ප්‍රසිද්ධියේ එකට මුණගැසී තිබේ. කලක් සමීප හිතවතුන්ව සිටි ඔවුන් දෙදෙනා, මත ගැටුම් හේතුවෙන් ප්‍රතිවාදීන් බවට පත්ව සිටි පසුබිමක,

සැප්තැම්බර් 21 වන ඉරිදා දක්ෂිණාංශික මතධාරී චාලි කර්ක් සිහි කිරීමේ උත්සවයකදී මෙලෙස නැවත හමුවිය. ඇරිසෝනාහි ග්ලෙන්ඩේල් හිදී පැවති මෙම උත්සවයේදී, ටෙස්ලා සමාගමේ නිර්මාතෘවරයා වන මස්ක් ජනාධිපති ට්‍රම්ප් සමඟ අතට අත දී, දෙදෙනා එකිනෙකා අසල අසුන් ගත්හ. සැප්තැම්බර් 10 වන දින ඝාතනයට ලක්වූ චාලි කර්ක් වෙත ශ්‍රද්ධಾಂජලි දැක්වීමට දහස් ගණනක් මෙම අවස්ථාවට එක්ව සිටියහ.

මෙම හමුවේදී දෙදෙනා අතර සිදුවූ සුහද කතාබහ බොහෝ දෙනාගේ අවධානයට ලක්වූ අතර, එහි අන්තර්ගතය කුමක්දැයි දැනගැනීමට බොහෝ දෙනා උනන්දු විය. මේ වනවිට, තොල් සලකුණු කියවීම පිළිබඳ විශේෂඥවරියක් ඔවුන් දෙදෙනා අතර සිදුවූ සංවාදය හෙළිකර ඇත.

'ඩේලි මේල්' පුවත්පත වාර්තා කරන පරිදි, ට්‍රම්ප් පළමුව මස්ක් දෙසට හැරී, "ඔබට කොහොමද" ලෙස විමසා, අනතුරුව "ඉතින් ඉලොන්, මට ආරංචියි ඔබට කතා කිරීමට අවශ්‍යව තිබුණා කියා" යනුවෙන් පවසා තිබේ. පසුව ට්‍රම්ප්, "අපි නැවත එකට වැඩ කළ හැකි මාර්ගයක් සකසා ගැනීමට උත්සාහ කරමු" යැයි යෝජනා කර ඇත. මස්ක් හිස වනමින් එයට එකඟත්වය පළ කිරීමෙන් අනතුරුව, ජනාධිපති ට්‍රම්ප් ඔහුගේ අත අල්ලා ගනිමින්, "මට ඔබව නැතුව පාලුයි" යැයි පවසා ඇති බව එම විශේෂඥවරිය හෙළිකර තිබේ.

මස්ක් සහ ට්‍රම්ප් අතර මෙම මතභේදය නිර්මාණය වීමට මූලික හේතුව වූයේ ට්‍රම්ප් ජනාධිපතිවරයා ලෙස හඳුන්වා දුන් "බිග් බියුටිෆුල්" නමැති බදු සහ වියදම් පනතයි. මුල් අවධියේදී ට්‍රම්ප්ගේ මැතිවරණ ව්‍යාපාරයට මූල්‍යමය සහ ප්‍රසිද්ධ සහයෝගය ලබාදෙමින් ඔහුව බලයට ගෙන ඒමට මස්ක් කටයුතු කළ ද, මෙම නව පනත මගින් ඇමරිකානු රජයේ අයවැය හිඟය තවත් උග්‍ර වනු ඇතැයි මස්ක් තර්ක කළේය. එම පනත සම්මත වුවහොත් තමන් නව "ඇමරිකානු පක්ෂයක්" නිර්මාණය කරන බවට අනතුරු අඟවා සිටි ඔහු, එය සම්මත වීමත් සමඟම එම පක්ෂය පිහිටවූ බව නිවේදනය කළේය. මීට අමතරව, කුප්‍රකට ජෙෆ්රි එප්ස්ටයින්ට අදාළ ලිපිගොනු තුළ ජනාධිපති ට්‍රම්ප්ගේ නමද ඇතුළත් බවත්, රජය එම ලිපිගොනු ප්‍රසිද්ධ නොකිරීමට හේතුව එය බවත් මස්ක් චෝදනා කර තිබිණි.

ජෙෆ්රි එප්ස්ටයින් යනු බාලවයස්කාර දැරියන් ලිංගික අපයෝජනය කිරීම සහ ජාවාරම් කිරීම සම්බන්ධයෙන් චෝදනා ලැබූ පුද්ගලයෙකි. ඔහුට එරෙහිව ඉහළ පෙළේ දේශපාලනඥයන්, ව්‍යාපාරිකයන් සහ ප්‍රසිද්ධ පුද්ගලයන්ගේ ලිංගික තෘප්තිය සඳහා බාලවයස්කාරියන් යොදා ගැනීමේ චෝදනා එල්ල වී තිබිණි.