ඇමරිකාවේ ටෙක්සාස් ප්රාන්තයේ, විශේෂයෙන්ම එහි හිල් කන්ට්රි කලාපයේ මෑතකදී ඇතිවූ දරුණු ගංවතුර තත්ත්වය හේතුවෙන් ඛේදජනක ජීවිත හානි රැසක් සහ පුළුල් විනාශයක් සිදුව තිබේ. 2025 වසරේ ජූලි මස මුල් භාගය වන විට, ග්වඩලුපේ ගංගාව ආශ්රිතව හටගත් විනාශකාරී හදිසි ගංවතුර හේතුවෙන් අවම වශයෙන් පුද්ගලයින් 24 දෙනෙකු මියගොස් ඇත.
'කෑම්ප් මිස්ටික්' නම් ගිම්හාන කඳවුරක සිටි බහුතරයක් ළමුන් ඇතුළුව, පුද්ගලයින් 23ත් 25ත් අතර සංඛ්යාවක් තවමත් අතුරුදන්ව සිටින බවට වාර්තා වේ.මෙම ගංවතුර තත්ත්වය අතිශයින්ම වේගවත් හා දරුණු එකක් වූ අතර, ග්වඩලුපේ ගංගාවේ ජල මට්ටම මිනිත්තු 45ක් වැනි කෙටි කාලයක් තුළ අඩි 26කින් පමණ ඉහළ නැංඟීම හේතුවෙන් බොහෝ පදිංචිකරුවන් සහ කඳවුරුකරුවන්ට ඒ සඳහා සූදානම් වීමට අවස්ථාවක් නොලැබිණි. 2025 වසරේ ජූලි මස 4 වන දින අලුයම හදිසියේ ආරම්භ වූ අධික වර්ෂාපතනයත් සමඟ මෙම තත්ත්වය, ප්රාදේශීය නිලධාරීන් විසින් 'මහා විපත් සිදුවීමක්' ලෙස නම් කරනු ලැබීය. පුළුල් මුදා ගැනීමේ මෙහෙයුම් දියත් කර ඇති අතර, ඊට හෙලිකොප්ටර් යානා සහ සියගණනක පිරිසක් ඇතුළත් වේ. මේ වන විට හෙලිකොප්ටර් යානා මඟින් 167 දෙනෙකු ඇතුළුව, පුද්ගලයින් 237 දෙනෙකුට අධික පිරිසක් ඉවත් කරගෙන ඇත.
ටෙක්සාස් ආණ්ඩුකාර ග්රෙග් ඇබට් මෙම සිදුවීම 'අසාමාන්ය මහා විපතක්' ලෙස හඳුන්වා දුන් අතර, ව්යසනයේ පරිමාණය සහ අඛණ්ඩව ක්රියාත්මක වන සෝදිසි සහ මුදා ගැනීමේ මෙහෙයුම් පිළිබඳව ඔහු අවධාරණය කළේය. මෙම ගංවතුර හේතුවෙන් සැලකිය යුතු දේපළ හානියක් සිදුව ඇති අතර, අවතැන් වූ පදිංචිකරුවන් සඳහා හදිසි නවාතැන් මධ්යස්ථාන විවෘත කර තිබේ.
Comments
Post a Comment
Your comment will be visible after approval