හිටපු අමාත්‍ය මහින්දානන්ද අලුත්ගමගේ මහතා තමන්ට එරෙහිව පනවා ඇති වසර 20ක සිර දඬුවමට එරෙහිව ශ්‍රේෂ්ඨාධිකරණයට අභියාචනයක් ඉදිරිපත් කර ඇති බව වාර්තා වේ. 2015 වසරේ පැවති ජනාධිපතිවරණය සමයේ නීතිවිරෝධී ලෙස කැරම්බෝඩ් සහ දාම් ලෑලි මිලදී ගැනීම හා බෙදා දීම හරහා රජයට සිදු කළ පාඩුව සම්බන්ධයෙන් ඔහුට මෙම දඬුවම නියම කර ඇත.
නීතිඥ සනත් විජේවර්ධන මහතා මාර්ගයෙන් ගොනු කර ඇති මෙම අභියාචනය, ශ්‍රේෂ්ඨාධිකරණයට ඉදිරිපත් කිරීම සඳහා දැනටමත් කොළඹ මහාධිකරණය වෙත භාර දී ඇත.
අල්ලස් කොමිසම විසින් ගොනු කරන ලද නඩුවේදී, කොළඹ ත්‍රිපුද්ගල මහාධිකරණ විනිසුරු මඩුල්ලක් විසින් මහින්දානන්ද අලුත්ගමගේ මහතාට බරපතළ වැඩ සහිත වසර 20ක සිර දඬුවමක් සහ දඩ මුදලක් නියම කර ඇත. මෙම නඩුවේ චෝදනාව වූයේ 2015 ජනාධිපතිවරණය අතරතුර කැරම්බෝඩ් 14,000ක් සහ දාම් ලෑලි 11,000ක් නීති විරෝධී ලෙස මිලදීගෙන ක්‍රීඩා සංගම් අතර බෙදා දීම මගින් රජයට රුපියල් මිලියන 53කට අධික පාඩුවක් සිදු කිරීමයි.
අභියාචනයේ සඳහන් කර ඇති ආකාරයට, ත්‍රිපුද්ගල මහාධිකරණ විනිසුරු මඩුල්ල ඇතැම් කරුණු වැරදි ලෙස අර්ථකථනය කරමින් මෙම තීන්දුව ලබා දී ඇති බව අභියාචක පවසයි. එසේම, විත්තිය විසින් ඉදිරිපත් කරන ලද ඇතැම් වැදගත් කරුණු නඩු තීන්දුව ලබා දීමේදී මහාධිකරණ විනිසුරු මඩුල්ල විසින් සැලකිල්ලට ගෙන නොමැති බවද අභියාචනයේ දක්වා ඇත.
මහින්දානන්ද අලුත්ගමගේ මහතා සිය අභියාචනයේ තවදුරටත් සඳහන් කරන්නේ තමන්ට එරෙහිව පනවා ඇති දඬුවම නීතියට පටහැනි බවයි. ඒ අනුව, අදාළ තීන්දුව බල රහිත කරන ලෙසත්, සියලු චෝදනාවලින් නිදොස් කොට නිදහස් කරන ලෙසත් ඔහු ශ්‍රේෂ්ඨාධිකරණයෙන් ඉල්ලා සිටී.
මෙම සිද්ධිය සම්බන්ධයෙන් අධිකරණ ක්රියාමාර්ග ඉදිරියට සිදුවනු ඇති අතර, ශ්‍රේෂ්ඨාධිකරණය විසින් අභියාචනය විභාග කිරීමට දිනයක් තවමත් නියම කර නොමැත.
Comments
Post a Comment
Your comment will be visible after approval