බ්රසීලයේ සාවෝ පාවුලෝ නගරයේ සිකුරාදා උදෑසන සිදුවූ භයානක ගුවන් අනතුරකින් පුද්ගලයින් දෙදෙනකු මියගොස් තවත් හය දෙනකු තුවාල ලැබූ බව විදෙස් මාධ්ය වාර්තා කරයි.
කැම්පෝ ද මාර්තේ ගුවන්තොටුපොළෙන් ගුවන්ගත වූ බීච් එෆ්90 කින්ග් එයාර් ද්විත්ව එන්ජිම් සහිත කුඩා ගුවන් යානය, බාරා ෆුන්ඩා ප්රදේශයේ අවෙනිඩා මාර්කෙස් මාර්ගයේ බස් රථයක හා වෙනත් වාහන කිහිපයක ගැටී බිමට කඩා වැටුණි. මෙම අනතුර පෙරවරු 7:20ට පමණ සිදුව ඇති අතර, ගුවන් පාලන මධ්යස්ථානය සමඟ සන්නිවේදනය අහිමි වීමෙන් පසුව මෙම අනතුර සිදුව තිබේ.
ගුවන් යානයේ සිටි මගීන් දෙදෙනා අනතුරෙන් පසු ඇතිවූ ගින්නෙන් පිළිස්සී මියගොස් ඇත. අනතුරින් බස් රථයේ ගමන් ගත් පස්දෙනකු සහ යතුරුපැදිකරුවකු ඇතුළු පුද්ගලයින් හය දෙනකු තුවාල ලබා ඇත.
තුවාල ලැබූවන් අතරින් යතුරුපැදිකරු සහ බස් රථයේ ගමන් ගත් කාන්තාවක් බරපතල තුවාල ලබා රෝහල්ගත කර ඇති අතර, අනෙක් සිව්දෙනා සුළු තුවාල ලබා ඇත.
රියෝ ග්රෑන්ඩ් දෝ සුල් ප්රාන්තයේ පෝර්ටෝ අලේග්රේ වෙත ගමන් කරමින් සිටි මෙම ගුවන් යානය, ගුවන්ගත වීමෙන් මොහොතකට පසු ගුවන් පාලන මධ්යස්ථානය සමඟ සබඳතා අහිමි කර ඇත. අනතුරින් පසු වහාම ගිනි නිවන හමුදා සහ හදිසි ප්රතිචාර කණ්ඩායම් සිද්ධිස්ථානයට පැමිණ ගින්න නිවා දැමීමට සහ විපතට පත්වූවන්ට සහය වීමට කටයුතු කර තිබේ.
සාවෝ පාවුලෝ නගරාධිපති රිකාර්ඩෝ නුනෙස් මහතා සමාජ මාධ්ය ජාල හරහා මෙම සිදුවීම සම්බන්ධයෙන් තම සානුකම්පිත බව ප්රකාශ කරමින්, විපතට පත් වූවන්ට සහ ඔවුන්ගේ පවුල්වල සාමාජිකයින්ට සෑම ආකාරයක සහයක්ම ලබා දෙන බව සහතික වී ඇත. "අපි විපතට පත්වූවන්ට සහය වීම සඳහා සියලු යටිතල පහසුකම් සපයමින් සිටිමු," යනුවෙන් ඔහු සඳහන් කර ඇත. මෙම අනතුර පිළිබඳ පූර්ණ පරීක්ෂණයක් ආරම්භ කර ඇති අතර, ගුවන් යානය හදිසි ගොඩබැස්සීමක් සිදු කිරීමට උත්සාහ කළේද යන්න තවමත් පැහැදිලි නැත.
සිද්ධිය අවස්ථාවේ පටිගතව තිබූ වීඩියෝවක දර්ශන පහතින්
){kind=link}
Comments
Post a Comment
Your comment will be visible after approval