දකුණු කොරියානු ජනපති දෝෂාභියෝගයකින් නෙරපයි - සෝල් නුවර ප්‍රීති ඝෝෂා

දකුණු කොරියාවේ මේ දිනවල ආන්දෝලනයක් ඇතිකරමින් හදිසි නීතිය පැනවූ  ජනාධිපති යූන් සුක් යෝල් වෙනුවෙන් ජාතික මහා මණ්ඩලය දෝෂාභියෝග ඡන්දයක් පවත්වා ඇති අතර ඉන් ඔහු පරාජයට පත්වූ බව අද වාර්තා විය.
එය රටේ සැලකිය යුතු දේශපාලන කැළඹීමක් සනිටුහන් කරයි. මෙම තීරණය ගෙන ඇත්තේ දෙසැම්බර් 3 වන දින යූන් විසින් පැය හයක් පමණක් පැවති හමුදා නීතිය පැනවීමට දැරූ උත්සාහයෙන් පසුව ඇති වූ පුළුල් විරෝධතා හා දේශපාලන අස්ථාවරත්වය හේතුවෙනි.

සමස්ත සාමාජිකයින් 300 දෙනා ඡන්දයට සහභාගී වූ අතර, දෝෂාභියෝග යෝජනාව පක්ෂව ඡන්ද 204ක්, විපක්ෂව ඡන්ද 85ක් සහ වැළකී සිටීම් තුනක් සමඟ සම්මත විය.

පොදුජන බලවේග පක්ෂයේ (PPP) සාමාජිකයින් තම සහාය ඉවත් කර ගැනීමෙන් පසු දෝෂාභියෝග ක්‍රියාවලිය ආරම්භ කෙරිණි.

අගමැති හාන් ඩක්-සූ වැඩබලන ජනාධිපති ලෙස කටයුතු කරනු ඇති අතර, ආණ්ඩුක්‍රම ව්‍යවස්ථා අධිකරණය යූන්ගේ ඉරණම පිළිබඳව සලකා බලන අතරතුර දින 180ක් දක්වා කාලයක් ගත විය හැකිය.

විරෝධතාකරුවන් දහස් ගණනක් සෝල් නුවර වීදි වල මෙම ප්‍රතිඵලයට සතුටු වෙමින් ප්‍රීති ඝෝෂා පවත්වන බව එරට මාධ්‍ය වාර්තා කර තිබේ.

යූන් සහ ඔහුගේ සහචරයින් දැනට කැරලි ගැසීමේ චෝදනා සම්බන්ධයෙන් විමර්ශනයට ලක්ව සිටින අතර, ඔවුන්ගෙන් කිහිප දෙනෙකුට සංචාර තහනමක්ද පනවා ඇත.