sydney-beaches-closed-due-toxic-tar-balls

ඕස්ට්‍රෙලියාවේ සිඩ්නි නුවර  සංචාරකයින් සඳහා ප්‍රසිද්ධ බොන්ඩි වෙරළ ඇතුළු වෙරළ කිහිපයක් බ්‍රහස්පතින්දා දින නාන අයට තහනම් කෙරිණි. මෙයට හේතු වූයේ විෂ සහිත බවට සැක කෙරෙන කළු පැහැති ගෝලිකා සිය ගණනක් සිඩ්නි වෙරළ තීර වෙත ගසා ගෙන ඒම වාර්තාවීමයි.


වේවර්ලි කවුන්සිලය පූර්වාරක්ෂක පියවරක් ලෙස බොන්ඩි, බ්‍රොන්ටේ සහ ටැමරමා වෙරළවල් වසා දැමූ අතර, අසල්වැසි රැන්ඩ්වික් කවුන්සිලය දකුණු දිශාවේ තවත් වෙරළවල් හතරක් වසා දමා තිබේ.

"අපගේ ප්‍රජාවේ යහපැවැත්ම සලකා කවුන්සිලය වෙරළ තීර වසා දැමීමේ පූර්වාරක්ෂක පියවර ගෙන තිබෙනවා," යනුවෙන් වේවර්ලි නගරාධිපති විල් නෙමෙෂ් මහතා ප්‍රකාශයක් නිකුත් කරමින් පැවසීය.



රැන්ඩ්වික් කවුන්සිලය සිදු කළ මූලික පරීක්ෂණවලින් පෙනී යන්නේ මෙම වස්තූන් "තාර ගෝලිකා" - එනම් තෙල් සහ සුන්බුන් පිඩලි - බව ය.

නිව් සවුත් වේල්ස් ප්‍රාන්තයේ පරිසර ආරක්ෂණ අධිකාරිය පවසා සිටියේ ඔවුන් තම පරීක්ෂණ සිදු කරමින් සිටින බවත්, මෙම ගෝලිකා අසල පිහිනීමෙන් හෝ ඒවාට ස්පර්ශ කිරීමෙන් වැළකී සිටින ලෙසත් ය.

සිඩ්නි නුවර එහි වරායේ සහ සාගර තීරය දිගේ වෙරළවල් 100කට වැඩි සංඛ්‍යාවක් පිහිටා ඇති අතර, ඒවා ලොව පුරා ප්‍රසිද්ධ වී ඇත. මෙම වෙරළ සඳහා වසරකට සංචාරකයින් සහ දේශීය වැසියන් මිලියන ගණනක් පැමිණෙන බව පැවසේ.